Қазақстан Республикасының Президенті Н.Назарбаевтың 2018 жылғы 19 маусымдағы №702 Жарлығымен Шымкент қаласы республикалық маңызы бар қалалардың санатына жатқызылған болатын. 2019 жылдан бастап шымкенттіктер 19 маусымда «Қала күнін» тойлап келеді. Биыл мерейлі датаны қала халқы мәдениет ордасы – «Tulip Hall» конгресс холл ғимаратында атап өтті. Ел игілігіне берілген жаңа ,имаратитағы салтанатты шараға қала әкімі Ғабит Сыздықбеков, қалалық мәслихаттың төрағасы Бахадыр Нарымбетов, зиялы қауым өкілдері мен қала тұрғындары қатысты. Салтанатты іс-шарада қала әкімі мерекемен құттықтады.
-Шырайлы шаһарымыздың бүгінгі шуақты мерекесі — қала күні құтты болсын. 2200 жылдық тарихы бар қаламыз даму шежіресін алтын әріптермен жазып келеді. Қаламыздың келбеті жылдан-жылға ажарланып, экономикасы өрлеп, халықтың әл-ауқаты артуда. Жаңа идеялар мен жоспарлар, ауқымды инвестиция миллионды қаланың дамуына жаңа серпін берді. Игіліктің барлығы — сіз бен біздің ортақ еңбегіміз. Өз еңбегімен, күшімен және талантымен қаламыздың дамуы мен әл-ауқатына өлшеусіз үлес қосқан баршаңызға шын жүректен алғыс айтамын. Сіздерге зор денсаулық, амандық, барлық бастамаларыңызға сәттілік тілеймін! — деді Ғабит Әбдімәжитұлы.
Мегаполис мәртебесін алған 6 жылда қаланың экономикалық әлеуеті артып, барлық салада даму көрсеткіші өсіп келеді. Түрлі өндіріс орындары бой көтеріп, инвестициялық көрсеткіші өскен. Жиында қала әкімі Ғ.Сыздықбеков пен қалалық мәслихаттың төрағасы Б.Нарымбетов қаланың дамуына елеулі үлес қосқан бірқатар азаматтарды Шымкент қаласының “Құрметті азаматы” атағымен марапаттады. Олардың қатарында Орынбай Рахманбердиев, Досыбай Шерімқұлов, Баян Жандосова, Асма Қалыбекова, Өркен Әбдіреев, Момбек Әбдәкімұлы, Серікбай Онбаев сынды белгілі азаматтар бар.
Жаңа нысанның ашылу салтанатында көпшілік «Шымкент: Кеше. Бүгін. Ертең» тақырыбында көрмені тамашалады. Іс-шарада Қазақстанның халық әртісі, Мемлекеттік сыйлықтың лауреты Талғат Күзембаев, қалалық опера және балет театрының симфониялық оркестрі, хор ұжымы, «Шымкент концерт» концерттік ұйымының өнерпаздары мен «Қаған» вокалдық-аспаптық, «Қазына» ансамбльдері және заманауи бишілер тобы өнер көрсетті. Әлемдік және отандық классикалық музыка қорынан, сондай-ақ отандық композиторлар Е.Хасанғалиев, Е. Шакеев, Е.Серікбаев, Қ. Сапарбаевтың үздік туындыларынан әуезді әндер шырқалды.
Заман талабына сай тұрғызылған ғимарат – туризмді түлетуге сеп болмақ. Бүгінде туризм тек тарихи, табиғаты таңғажайып орындарда ғана емес, жаһандану тенденцияларына орайластырылған кез келген жерде ерекше маңызға ие болып келеді. Сондықтан, жаңа ғимарат дипломатиялық тұрғыда өтетін форумдар, іскерлік жиындар, конференциялар, жәрмеңкелер мен көрмелер секілді арнайы шаралар арқылы конгрестік туризмді дамытады. Ірі халықаралық, республикалық жиындар іскерлік туризмді дамытып, қаланың әлеуметтік-экономикалық тұрғыда көркеюіне үлес қосары анық. Жаңа үлгідегі жаңа нысан сондай-ақ, саяхатшыларды әсемдігімен де баурап алады. Құрылысы ерекше, сәулеті көз тартатын мәдени кешеннің жалпы аумағы 5,24 гектар. Нысанның жобасы 2021 жылы бекітіліп, құрылыс жұмысы 2023 жылы басталған болатын. Ал, ғимараттың ауданы – 17 964 шаршы метр. Үш қабатты ғимараттағы концерт залының сыйымдылығы – 2066 орын. Сондай-ақ, 190 орындық конференция залы бар. Мердігер «BI Global» ЖШС құрылыс жұмыстарын толық аяқтап, қала күніне орай пайдалануға тапсырды. Екі мың жылдан асатын көне Шымкенттің туризмнің сан саласы бойынша өзіндік орны бар. Сол тізімді толықтырған жана конгресс-холл ғимараты шаһардың экономикасы мен тұрмыс-тіршілігінің одан әрі жақсартуына үлес қосары анық.