Қазақтың өр мінезді қыздарының бірі Ханбибі Есенқарақызы биыл 75 жаста. Ақынның мерейтойына орай Түркістан облыстық тарихи-өлкетану музейінде “Мен-ақынмын, әйелмін, әлемді ойлар” атты шығармашылық кеш өтті. Мерекелік шараға мәдениет қайраткерлері, жақындары мен зиялы қауым өкілдері қатысты.
“Барыс” және “Парасат” ордендерінің, Халықаралық “Алаш” әдеби сыйлығының иегері, Қазақстанға еңбек сіңірген қызметкері, ақын, жазушы Ханбибі Есенқарақызының 75 жасқа толуына орай “Мен-ақынмын, әйелмін, әлемді ойлар” атты іс-шара ұйымдастырылды. Сыр-сұхбат кешінің басты мақсаты «Хан қызындай Хан апа» деп құрметтеген қаламгер Ханбибі Есенқарақызының ұлағатты өмір жолы мен еңбегін оқырмандарға таныстыру.
Қазақтың еңбек сіңірген қайраткерінің мерейтойына орай Шаһарда бірнеше кездесулер өтуде. Ал, тарихи-өлкетану музейінде өткен ешкімге ұқсамайтын, өзінің дара қолтаңбасымен ерекшеленетін ақынмен болған сыр-сұхбат көпшілік көңілінде қалатындай өтті. Рухани кеште өнерпаздар әсем ән орындап, оқырмандарға тарту етті. Кездесу барысында келген қонақтар Ханбибі Есенқарақызының еліне сіңірген еңбегі мен тұлғалық болмысына байланысты ойларын бөлісті.
Ханбибі Есенқарақызы 1949 жылы Оңтүстік Қазақстан облысы, Сарыағаш ауданында туған. Еңбек жолын туған жерінде ұстаз болып бастады. Шымкент педагогикалық институтының филология факультетін 1972 жылы сырттай тәмамдаған. Ханбибі Есенқарақызын әділдігі мен өр мінезі үшін халық оны Хан қызындай Ханбибі деп те атап кеткен. Оның шығармаларының қазақ поэзиясында алар орны ерекше.Шынайы мөлдір рухты өлеңдері кез-келген жастағы жанның жүрегін баурап алары анық.
