ЭКОЛОГИЯ ВИЦЕ-МИНИСТРІ ТҰРҒЫНДАРМЕН КЕЗДЕСТІ

Түркістан облысының тұрғындарымен және коммерциялық емес ұйымдарымен экология және табиғи ресурстар вице-министрі кездесіп, министрлік жетекшілік ететін салалардың дамуы туралы айтты. Жол картасында 21 іс-шара облыстың экологиялық мәселелері бойынша жоспарланған.
Түркістанға іс-сапармен келген Экология және табиғи ресурстар вице-министрі кездесуде облыстың экологиялық мәселелерін баяндады. Ағымдағы жылдың 6 айында, облыста зиянды заттар шығарындыларының нақты көлемі 23,5 мың тоннаны құраған, бұған табиғат қорғау іс-шараларын іске асыру есебінен қол жеткізілген. Бүгінгі таңда ғарыштық мониторинг арқылы, облыс аумағында рұқсат етілмеген қоқыс тастайтын 19 объект анықталып, оның ішінде 1 объект жойылған. Өңірде коммуналдық қалдықтарды бөлек жинаумен, сұрыптаумен айналысатын 17 кәсіпорын жұмыс істейді. Облыс әкімдігі қоршаған ортаны қорғау жөніндегі іс-шаралар жоспарын әзірлеп, облыстық мәслихатпен бекіткен. 3 жылдық іс-шаралар жоспарында бюджет қаражаты есебінен жүзеге асырылатын қоршаған ортаны жақсарту шаралары қарастырылған. Қазіргі таңда облыстағы экологиялық жағдай тұрақты деді Нұркен Шәрбиев.
Орман шаруашылығы саласында Президенттің 2 млрд. ағаш отырғызу бастамасы аясында, биыл облыста 25,6 млн. дана ағаш 15,5 мың гектар жерге отырғызу жоспарланып, жыл басынан бері 2 мың гектар алқапқа 4,2 млн. дана ағаш егілген. Айта кетейік, кездесу бағдарламасында өңірлік бұқаралық ақпарат құралдары үшін жеке қабылдау және брифинг көзделген.