Мегаполистегі «Жастар денсаулық орталығында» 24 маусымнан бастап ашық есік күні өтуде. Репродуктивті денсаулық апталығы аясында «Арбат» алаңында мекеме қызметкерлері тегін кеңес берді. Сонымен қатар салауатты өмір салтын насихаттау мақсатында спорттық іс-шара ұйымдастырылып, жасөспірімдерге адамдағы иммунтапшылығы вирусы және жұқтырылған иммунтапшылығы синдромын алдын алу бойынша түсіндірме жұмыстары жүргізілді.
Елімізде Қазақстан Республикасы Президентінің жанындағы Әйелдер істері және отбасылық-демографиялық саясат жөніндегі ұлттық комиссияның қолдауымен Репродуктивті денсаулық апталығы өтуде. Профилактикалық шарада қалалық денсаулық сақтау басқармасына қарасты Жастар денсаулық орталығының уролог, гинеколог,психолог дәрігерлері қала тұрғындарына медициналық кеңес берді.
Сондай-ақ, жұқтырылған иммунтапшылығы синдромының алдын алу мен оған күрес орталық қызметкерлері жедел тест сынамасын алып, адамдағы иммунтапшылығы вирусы-инфекциясын алдын алу бойынша ақпараттық түсіндіру жұмыстарын жүргізді. Ал, «Қалалық перзентхалалық орталықтың» акушер-генекологы қазіргі уақытта жастар арасында ерте жүктілік көбейгенін, және жасөспірімдерге жүктілікті жоспарлау бойынша кез-келген емханадағы мамандардан кеңес алу керектігін айтты.
Шараға қатысқан жасөспірімдер спорттық шараға белсенді қатысып,өзара сайысты. Жарыста үздік атанған жастарға марапат беріліп,түрлі сыйлықтар табысталды.