Шаһар аспанын термемен тербеген байқау аяқталды. 21 жыршы бақ сынаған жарыста, Қызылордалық термеші оқ бойы оза шығып, автокөлікті қанжығасына байлады. Айта кетейік, Шалқар Әбішұлының 80 жылдығына арналған терме кеші, қазақ эстрадасының жарық жұлдыздарының қатысуымен жалғасын тапты.
Терме ғибраттылық мәні бар, ата-баба өсиетін, өмірлік қағидасын қадір тұтуға үйрететін қазақтың тарихы тереңде жатқан өнері. Шымқаланы екі күн жырға толтырып, терменің өсиетіне қанықтырған байқау өз мәресіне жетті. Шалқар Әбішұлының 80 жылдығы мен қазақ мұрасы термені насихаттау мақсатында ұйымдастырылған кештің қорытындысы Түркістан сарайында өтті. Салтанатты жиынға Шымкент қалалық мәдениет, тілдерді дамыту және архивтер басқармасының басшысы қатысып, құттықтау сөз сөйледі.
Айта кетейік, «Шалқар термесі-2024» ІІІ республикалық термешілер байқауына мәдениет қайраткері Қанат Айтбаев, айтыскер ақын Бекарыс Шойбеков сынды елімізге белгілі тұлғалар әділ қазылық еткен болатын.
Сонымен қоса ісшарада Шалқар Әбішұлының әулеті мен өмірлік серігі Мәрия анамыз бен ұлдары да болды. Бақыт Шалқарұлының айтуынша, араға ұзақ уақыт салып қайта жаңғырған республикалық термешілер байқауын алдағы жылда жастардың арасында өткізу жоспарлануда.
Байқауға қатысушы термешілер ақшалай сыйлық және сертификатпен марапатталды. Жүлделі орындардан бөлек ең жас термеші номинациясын Аяжан Акиева иемденсе, Шалқар ағамыздың жары Мәрия анамыздың «Ананың ақ тілегі» жүлдесі Оразалы Игілікке берілді. Ал бірінші орын мен 1 млн теңге ақшалай сыйлық жерлесіміз Ербол Қалмырзаевқа бұйырды.
Бас жүлде автокөлік Қызылорда қаласынан келген Марат Сүгірбайдың қанжығасына байланды.
Айта кетейік, мерекелік кеш Нұрлан Өнербаев, Ұлықпан Жолдасов, Мирас пен Құралай, Заттыбек Көпбосынов сынды қазақ эстрадасының жарық жұлдыздарының өнер көрсетуімен жалғасты.
