Мегаполис жұртшылығы мәдениет қайраткері Шалқар Әбішұлын еске алды. Ел жанашыры көзі тірісі болса 80 жасқа келер еді! Кереметтей қайырымды істерімен көптің көңілінен орын алған азамат ел жадынан жоғалған емес. Артында қалған ұрпағы ата-ана өнегесін дәріптеп, оның рухы алдындағы перзенттік парызын адал атқару мақсатында алыс-жақын ағайындардың басын қосып, ас берді.
Көзден кетсе де, көңілден кетпеген ақынның ерен еңбегін ел ұмытқан емес! Қазақ елі Шалқарды халық жанашыры деп біледі. 1992 жылы Шымкент қаласында Орта Азия бойынша тұңғыш рет «Аштықпен емдеу» орталығының негізін қалап, халық игілігіне берді. 1999 жылдан бастап Оңтүстік Қазақстан облыстық мәслихатының депутаты болған. Бүгінде шалқыма шабытты Шалқардың шығармашығы өнердің өрістеуіне үлесін қосуда! Жиналған қауым ел ардақтысын еске алып, ақынның әруағына құран бағыштады.
Ақынды еске алуға бірқатар мәдениет саласының үздіктері де келді. Онда Шалқардың еңсерген игі істерінің оң нәтижесі мен жақсылықтары айтылды. Жиналған қауым ақын туралы айтылған тағылымды әңгімілердің куәсі болды.
Айта кетейік, еске алу шарасынан соң ақынның құрметіне орай 3-ші рет ұйымдастарылып, 2 күнге созылған «Шалқар термесі» атты республикалық термешілер байқауының жеңімпаздары анықталады. Шараны ақынның ұрпағы мен «Шалқар мұрасы» қоғамдық қоры ұйымдастырып отыр.
