Мемлекет Басшысы Қасым-Жомарт Тоқаевтың 2023 жылғы 1 қыркүйектегі «Әділетті Қазақстанның экономикалық бағдары» атты Қазақстан халқына Жолдауы шеңберінде, Бірыңғай сенім телефонын ұйымдастыру бөлігінде Қазақстан Республикасы Цифрлық даму, инновациялар және аэроғарыш өнеркәсібі министрлігі «AMANAT» партиясымен және «Азаматтарға арналған үкімет» мемлекеттік корпорациясы» КЕАҚ-мен (бұдан әрі — Мемлекеттік корпорация) бірлесіп, отбасы, әйелдер мен балалардың құқықтарын қорғау мәселелері бойынша «111» Байланыс орталығын ұйымдастырды.
«111» Байланыс орталығы азаматтарға отбасы, әйелдер мен балалардың құқықтарын қорғау мәселелері бойынша ақпараттық-анықтамалық кеңес, психологиялық көмек көрсетеді, сондай-ақ келіп түскен өтініштер бойынша орталық мемлекеттік органдарды, жергілікті атқарушы органдарды хабардар етеді және азаматтарға өтініштердің орындалу деңгейі туралы ақпарат береді.
«111» Байланыс орталығының операторлары отбасыларға өмірлік қиын жағдайда, тәулік бойы, үзіліссіз, демалыс және мереке күндерінсіз көмек көрсету үшін жедел топтармен тікелей тегін байланыста болады.
«111» Байланыс орталығын құру азаматтарға, әсіресе отбасыларға, әйелдер мен балаларға мемлекеттен тиімді құрал — уақытылы көмек көрсетуге жағдай жасауға мүмкіндік береді.
ҚР ЦДИАӨМ баспасөз қызметі
