Мегаполисте мәслихат депутаттары қала тұрғындарымен турнирде кездесті. Еліміздің барлық өңірінде бастау алған әуесқойлар арасындағы «Senat Open» шахмат турнирі Шымкентте шымылдық түрді. Ақыл мен ой-өрісті дамытатын үстел спортына қызығушылық танытқандардың қарасы қалың. Алғаш рет ұйымдастырылып отырған байрақты бәсекеге 120 өтінім келіп түскен. Іріктеуден өткен үздік ойыншылар өңірлік бәсекеде бақ сынайды.
Мемлекет басшысы Қасым-Жомарт Тоқаев әділетті Қазақстанды құру жолында адал ұрпақ тәрбиелеу керектігін, ол адал ұрпақтың ой өрісінің дамуына шахмат спортының үлесі мол екендігін ескеріп, Үкіметке үстел спортын дамытуда бірқатар тапсырмалар берген болатын. Осы жоба аясында еліміздің барлық өңірлерінде ҚР Парламент Сенатының бастамасы бойынша «Senat open» ашық турнирі шымылдық түрді. Іріктеу турниріне қатысуға қалалық мәслихат депутаттары, Қоғамдық кеңес мүшелері, ардагерлер, қоғам белсенділері мен БАҚ өкілдерінен 120 өтінім түсті.
Қазақстан шахмат федерациясының қолдауымен Шымкент қалалық мәслихатының ұйымдастыруымен бастау алған байрақты бәсекенің салтанатты ашылуында әнұран орындалып, барлық қатысушылар көк туға қарап сап түзеді. Ал, турнирге қызығушылық танытып, қатысушылардың ішінде 86 жастағы қариямыз да бар.
FIDE ережесіне сәйкес бекітілген турнирде шахматшылардың тәртібін қадағалау мақсатында 7 төреші алқасы құрылды. Онда әр турға 15 минут уақыт берілді.
Интеллектуалды ойынның қорытындысы бойынша қатысушылар командалық және жекелей жүлделермен марапатталды. Төрешілер шешіміне сәйкес жекелей сында бақ сынаған қала тұрғыны Сейітжан Джаханов топ жарды. Одан бөлек үздік деп танылғандар мен барлық қатысушыларға медальдар мен алғыс хаттар табысталды.
Іріктеуден өткен 25 үздік шахматшыға 18 маусым қала күніне орай Шымкент қаласында өтетін өңірлік жартылай финалға жолдама берілді. Жартылай финалдан өткен жеңімпаздар алдағы уақытта Астана қаласында өтетін финалдық ойында бақ сынайды.
