Өткен жылдың шілде айында Әлеуметтік Кодекс қабылданған болатын. Осының аясында әлеуметтік салаға бірқатар өзгерістер еніп жатыр. Жұмыспен қамту, зейнетақыдан бұрын, негізгісі — мүгедектігі бар азаматтар санатына арналған. Яғни, келер жылдан бастап олар жан басына қаржыландыру есебінен өмір сүру сапасын жақсартуға мүмкіндік алады. Ол әсіресе ауылды жерде тұратын мүгедектігі бар адамдар үшін тиімді мүмкіндік болмақ. Бұл туралы еңбек және халықты әлеуметтік қорғау министрлігінің өкілдері айтты.
Еңбек және әлеуметтік қорғау вице-министрі Назгүл Ерікқызы Шымкентке жұмыс сапарын “Белсенді ұзақ өмір орталығынан” бастады. 2019 жылы жұмысын бастаған орталықтың шаһарда 3 нүктесі бар. Қаламызда 91 мыңнан астам зейнет жасындағы жандар болса, олар осында келіп әлеуметтік-мәдени, спорт секторына қатыса алады. Бұл қарияларымыздың уақытын тиімді өткізуге, әрі өмір сүру сапасын жақсартуға бағытталған. Орталық пен бөлімшелерге келушілер үшін екі ауысымда 34 қызмет түрі көрсетіледі. Салалық министрліктің мамандары бірнеше кабинетті аралап, зейнеткерлермен тілдесті.
Мұнан соң ҮЕҰ өкілдерімен, мүмкіндігі шектеулі азаматтармен кездесіп, саладағы жаңалықтармен бөлісті. Атаулы әлеуметтік көмек, зейнетақы, мүгедектігі бар адамдарды әлеуметтік қорғау бойынша нақтыланған жоспарды таныстырды.
Сондай-ақ, 2025 жылдан бастап атаулы әлеуметтік көмек беру үшін кедейлік шегі бүгінгі күнкөріс деңгейі арқылы емес, медиандық табыс деңгейі арқылы анықталады. Бұл ең төменгі күнкөріс деңгейінен 1,5 есеге жоғары. Яғни, жәрдемақы сомасы өседі деген сөз.
Азаматтарды жеке қабылдау сағатында вице-министрге қала тұрғындары өзекті деген сауалдарын қойды. Әлеуметтік порталдағы кемшіліктер, материалдық көмектің жеткіліксіздігі секілді мәселелер көтеріліп, азаматтар ұсынысын білдірді.
Еңбек және әлеуметтік қорғау вице-министрі айтылған ұсыныстар назарға алынатынын, жергілікті әкімдікпен бірлесіп жұмыс істейтінін айтты.
