«Нұр Отан» партиясы Шымкент қалалық филиалының кезектен тыс ХХХ конференциясы өтті. Оған саяси кеңес мүшелері мен бастауыш партия ұйымының төрағалары сонымен бірге партия филиалдарының конференцияларында сайланған 98 делегаттың 91-і қатысты. Ал, күн тәртібінде мемлекеттік «Нұрлы жер» бағдарламасының жобасын талқылау және 13-ші қаңтар күні өтетін «Нұр Отан» партиясы ОҚО филиалының кезектен тыс 30-шы конференциясына Шымкент қаласынан қатысатын делегаттар құрамын бекіту сынды екі мәселе қаралды.
Жиында алғашқы мәселе бойынша сөз алған Шымкент қаласы әкімінің орынбасары Нұралхан Көшеров «Нұрлы жер» мемлекеттік бағдарламасының негізгі мақсаты мен бағдарламаны жүзеге асыру бағытында атқарылатын жұмыстарға тоқталды. Айта кету керек, аталмыш жаңа бағдарлама еліміздің әрбір азаматына 10 соттық жер бөлу мақсатын көздейді. Бұл ретте қаламыз бойынша жер телімі үшін 89 мыңнан астам азаматтың кезекте тұрғандығын айтқан қала әкімінің орынбасары алдағы уақытта 45 мыңға жуық жер учаскесін әзірлеу жобасы бар екендігін жеткізді. Ол үшін ең алдымен үлестіруге жарамды жерлердің коммуникациясын, инженерлік-инфрақұрылымын дайындап алу басты міндет. Осылай деген Нұралхан Көшеров бұл жұмыстарды жүзеге асыруға 25 млрд тенгеден астам қаржы қажеттігін де атап өтті. Ал бөлінуге жататын учаскелер негізінен қаланың шеткері аймақтарындағы Құрсай, Айкөл 2, Ақтас елді мекендері аумақтарынан әзірленбек.
Конференция күн тәртібіндегі осы мәселе төңірегінде Шымкент қалалық Тұрғын үй қатынастары бөлімі басшысының орынбасары Гүлнар Әшірбаева да баяндама жасап қала тұрғындарын баспанамен қамту бағыттары бойынша атқарылып жатқан жұмыстарды сөз етті. Өз кезегінде конференция жұмысына қатысқан бірқатар халық қалаулылары әлеуметтік әлсіз топтар мен көп балалы отбасыларды тұрғын үймен қамтуға басымдық беру қажеттігін айтып, өзекті ұсыныс пікірлерін ортаға салды. Осылайша өрбіген конференция күн тәртібіндегі екінші мәселе 13-ші қаңтар күні өтетін «Нұр Отан» партиясы ОҚО филиалының кезектен тыс 30-шы конференциясына Шымкент қаласынан қатысатын делегаттар құрамын бекіту болатын. Бұл ретте партия мүшелері ұсынылған кандидаттарды тізім бойынша бір ауыздан қолдап дауыс берді. Сонымен конференция қорытындысы бойынша айтылған ұсыныстар назарға алынып делегаттар құрамы бекітілді.
