Мегаполистің бүгінде құрылысы қарқын алған. Халық санының өсуіне сай инфрақұрылымдар тартылып, тұрғын үйлер мен стартегиялық маңызы нысандар көптеп бой көтеруде.
Қарқынды құрылыспен қала әкімі Ғабит Сыздықбеков еьтене танысып, өз тарапынан тапсырмалар берді. Мегаполис басшысы құрылысы жүріп жатқан жаңа әуежай терминалына барып, бір ай бұрын берген тапсырмаларының орындалу барысы мен жұмыс қарқынын бақылап қайтты.
Шаһар басшысы сала мамандарымен кездесу кезінде әрбір нысан құрылысы белгіленген мерзімде тапсырылып қана қоймай, сапалы шығуы тиіс деп шегеледі.
Бұдан бұрын хабарлағанымыздай, жолаушылар терминалы құрылысының 1-кезеңі аяқталды. Шатыры монтаждалып, қасбеті жаңғыртылды.
Сонымен қатар жаңа әуежайға инфрақұрылым жүйелерін тарту жұмыстары кестеге сай жүргізілуде. 800 жұмыс қолы тартылған.
Жаңа терминалдың жалпы ауданы 40 800 шаршы метрді құрайды. 24 эскалатор, 2 трафик, 24 жеделсаты, заман талабына сай келетін 4 галерея қарастырылған. Барлығы жеке инвестор есебінен салынуда.
Аэропортта жолаушы өткізу қабілеті сағатына 200 адам болса, жаңа терминал іске қосылғаннан кейін бұл көрсеткіш еселеніп, 2 000 адамға артады.
Қазіргі таңда перрон құрылысын жүргізуге жобалық-сметалық құжаттар әзірленіп, мемлекеттік сараптаманың оң қорытындысы берілді. 6 гектар аумақта тиісті жұмыстар атқарылуда.
Әуежай құрылысының 2-кезеңі 2024 жылы аяқталып, ел игілігіне беріледі.
Қала басшысы сондай-ақ Тассай шағын ауданында жүргізіліп жатқан табиғи газ жүйесінің құрылысымен де танысты.
Құрылыс жұмыстарын бақылаған қала басшысы мердігерге жұмысты жандандыру ғана емес, сапалы жүргізуді міндеттеді. Егер талаптары орындалмаса, тиісті мамандарға мердігерді жауапқа тартуды ескертті. Өйткені жергілікті тұрғындар орындаушылардың жауапсыздығынан зиян шекпеу керектігін баса айтты. Сондай-ақ көгілдір отынның берілу мерзімі жайында халыққа түсіндірме жұмыстарын жүргізуді тапсырды.
Тассай шағын ауданындағы табиғи газ жүйесін тарту жұмыстары 2021 жылдың соңында басталды. Бүгінге дейін мердігер мекеме «Ремстрой» ЖШС жұмыс көлемінің 84 пайызын орындаған.
Газ тарату жүйесінің қуаттылығы – 12.5 м3/сағ, ал ұзындығы 68,8 шақырымды құрайды. Нысан келесі жылдың 1-тоқсанында пайдалануға беріледі. Нәтижесінде, 3 345 абонент көгілдір отынмен қамтылады.
Жалпы қала аумағында инфрақұрылымға қатысты жасалынған жұмыстар жетіп артылады. Қала тұрғындаы үшін жайлы орта қалыптастыру мақсатында шаһар билігі жүйелі жұмыстар жүргізуде.
Атап айтқанда, Тұран ауданында 20,3 шақырымды құрайтын 33 көшенің құрылыс жұмыстары аяқталды. Биыл аталған ауданда жалпы ұзындығы 24 шақырымнан тұратын 41 көшеде ирригациялық арықтар салу жоспарланған.
Атап айтқанда:
– Қазығұрт ш/а – 16 көше (толық бітті);
– Ақжар ш/а – 8 көше (7 құрылыс бітті, 1 құрылысы жүруде);
– 112 орам – 6 көше (4 құрылысы бітті, 2 құрылысы жүруде);
– Түркістан ш/а – 4 көше (2 құрылысы бітті, 2 құрылысы жүруде);
– Орталық аумақ – 3 көше (2 құрылысы бітті, 1 құрылысы жүруде);
– Құрсай ш/а – 2 көше (1 құрылысы бітті, 1 құрылысы жүруде);
– № 4 ш/а – 1 көше (құрылысы бітті);
– Спорт ш/а – 1 көше (құрылысы жүруде).
Қазіргі уақытта қалған 8 көшенің құрылыс жұмыстары жалғасып жатыр. Жыл соңына дейін толық аяқталады.
