Бүгін ҚР Ұлттық ұланның құрылғанына 25 жыл. Осы орайда қаламыздағы 6506 әскери бөлімінде салтанатты шара өтті. Ел бірлігін бекем етіп, бар күші мен жігерін сарп етіп, ұлт намысын қорғап жүрген батыр ұландарымызды тәрбиелейтін Ұлттық ұландықтар бұл күні өз сарбаздарын марапаттады. Яғни, Ұлттық ұлан қатарына алынып, өзінің азаматтық міндетін мінсіз атқарып жүрген жас сарбаздар бұл күні марапатқа ие болды. Сонымен қатар, осы салада үздік еңбек етіп, жастарды тәрбиелеуде сүбелі үлес қосқан зейнеткер азаматтардың кеудесіне ҚР Тәуелсіздігінің 25 жылдық мерекелік төсбелгісі тағылды.
Айта кетейік, осыдан 25 жыл бұрын, яғни 1992 жылы елімізде Қазақстан Республикасы iшкi iстер органдарының бiрыңғай жүйесiне кiретін және жеке бастың, қоғам мен мемлекеттiң қауiпсiздiгiн қамтамасыз етуге, адамның және азаматтың құқықтары мен бостандықтарын қылмыстық және өзге де құқыққа қарсы қол сұғушылықтардан қорғауға арналған ҚР Ұлттық ұланы құрылған болатын. Ұлттық Ұланның қатарында қызмет ету көптеген жастар үшін құрмет. Мақсаты — мемлекеттік әскери шараларды және мемлекеттік объектілерді қорғауды, шетелдік делегацияларды қарсы алуды және шығарып салуды және басқа маңызды шараларды орындайды. Ұлан әскерлері өздерінің саптық бой түзеу мен шеберліктерін көрсетеді, бұл арқылы тәуелсіз мемлекетіміздің айбындылығын бейнелейді.
