Еңбек адамы – ел мақтанышы. Қоғамның сан түрлі саласында еңбек етіп, сол бағытты алға жылжытуға үлес қосып жүрген жандарға құрмет көрсетілді. Жастарға олардың қызметін көрсету арқылы адал еңбек етуді дәріптеп, еңбексүйгіштікке баулыған шара «Еңбек күніне» орайластырылып отыр.
«Еңбек күніне» орай «Еңбегімен елге сыйлы» атты іс-шара өтті. Мәдениет, тілдерді дамыту және архивтер басқармасына қарасты кітапхананың ұйытқы болуымен өткен іс-шара қоғамдағы еңбек адамдарының қызметін дәріптеу, жастарды еңбексүйгіштікке тәрбиелеу, еңбек адамдарын құрметтеу, түрлі мамандық иелерін мадақтау мақсатында ұйымдастырылды. Аталмыш жиынға түрлі салада еңбек етіп жүрген кәсіби мамандар, кітапхана оқырмандары, мәдениет қызметкерлері, кітапханашылар, оқушылар мен студенттер қатысты. Шара барысында көрермендер кітап көрмесі, фото көрме, дефиле шоуды тамашалап, түрлі мамандық иелерімен сұхбаттасты.
Шарада қонақтарды WorldSkills стандартына сәйкес «Мейрамхана» сервисі, тамақтану индустриясымен арнайы пән оқытушысы Айнұр Сайлауқызы таныстырып, шеберлік сабағын көрсетті. 2013 жылдан бастап мереке ретінде өтетін «Еңбек күні» қыркүйек айының соңғы жексенбісіне белгіленген. Биыл Еңбек күні мерекесінің он жылдығы.
