ҰЛТТЫҚ ҰЛАН — ҰЛТ РУХЫ

Ұлттық Ұланның ән-би ансамблі Шымкентте. Жалынды әндерімен жігер сыйлаушы оркестр әскер қызметінің имиджін көтеру, азаматтардың әскери қызметшілерге, жастарды патриотизмге баулу мақсатында гала-концерт өткізді. Ұжымның өнерпаздары рухты асқақтататын туындыларымен Отан қорғаушы ұландардың,  темірдей тәртіпті ту еткен жауынгерлерді тәрбиелеудің маңызды екенін жеткізді. Мерекелік шараға Отан алдындағы борышын өтеп жүрген сарбаздар да қатысты.Сарбаздарға, өсіп келе жатқан жас буынға еліміздің әскерін көрсету және соны баяндау  мақсатында «Ұлттық ұлан — ұлт рухы!” атты гала-концерт   өтті. Ауқымды шараға  әскери қызметшілер мен олардың отбасы мүшелері, күштік құрылым өкілдері қатысты. Мерекелік жиынға қатысқан Шымкент қаласы әкімінің бірінші орынбасары Қуаныш Асылов нағыз патриотизм мен ұлтжандылықтың үлгісін көрсетіп жүрген әскери қызметшілерге, жастардың рухын көтеруге салмақты үлес қосып жүрген Ұлттық ұлан ән-би ансамблінің өнерпаздарына үлкен алғыс білдірді.

Ең үздік әскери-музыкалық ұжым санатындағы Ұлттық ұлан ән-би ансамблі 1992 жылы Алматы қаласында ІІМ ұйытқы болуымен құрылған. Бастапқыда бірнеше адаммен құрылған ансамбль қатарында қазірде 100-ге жуық өнерпаз бар екен. Әскери, халық әндері және басқа да түрлі композицияларды шығармашылығына қосқан ұжым мегаполисте жиналған жұртшылыққа бар өнерін паш етті.

Көрермендер әлем халықтарының билерін және құрметті қарауыл ротасының дефилесін тамашалап, ансамбль ұжымына құрмет көрсетті. Әскери бөлімнің қызметкері мұндай шаралардың жастардың Отанға деген сүйіспеншілігін арттыруға септігі мол дейді. Ішкі істер министрлігі мен Қазақстан Республикасы Ұлттық ұланының ақпараттық насихаттау тобы еліміздің бірнеше облыс-қалаларында өнер көрсетіп келсе, алдағы күндерде Түркістан қаласында өз жұмысын жалғастырмақ.