Суретшілер одағының мүшесі, Халықтар достығы университетінің доценті, қылқаламымен жұртшылыққа танылған Асан Байназаров шығармашылық кешін өткізді. Табиғат сыйлаған талантын сан қилы бояулардан тұратын бейнелеу өнерімен ұштастырған суретшінің сырлы әлемі сан алуан тақырыпты қамтиды.
Өнерде шекара да шектеу де жоқ. Оғана дәлел суретші Асавн Байназаровтың сан саланы қамтыған шығармашылығы. Туындыларының бірі табиғатпен үндессе, бірі қоғамда орын алып жатқан басты тақырыптарға арналған, енді бірі уақытты артқа шегеріп, нәзік бояулар арқылы өткен тарихпен астасып жатыр. Осының бәрі «Менің әлемім» деп аталатын көрмеге топтастырылған.Жас кезінен бейнелеу өнеріне қызыққан суретші Ташкенттегі өнер институтында кескіндеме саласы бойынша кәсіби білім алады. 2009 жылы атамекеніне қоныс аударып, бірқатар оқу ордаларында шәкірт тәрбиелейді. 2016 жылы Қазақстан Суретшілер одағының мүшелігіне өткен. Жеке шығармашылық көрмені ұйымдастыруға ҚР суретшілер одағының Шымкент қалалық филиалы, академик Ә.Қуатбеков атындағы Халықтар Достығы университеті мен Пушкин атындағы әмбебап кітапханасы арқау болған. Жылдар бойғы еңбегін паш ететін көрмеде өнер иесінің әлемі туралы жылы лебіздер айтылды.
Көрмеге келген қонақтар суретшінің туындыларымен танысып, пікір алмасты. Халықтар Достығы университетінің ұжымы қатысып, әріптесіне қолдау білдірді. Жиын соңында оқу ордасының атынан құрмет көрсетіп, шығармашылығына толағай табыс тіледі.
