Үшінші мегаполис – өнер мен мәдениеттің дамыған ордасы. 2018 жылдың 19 маусым күні Шымкентке республикалық маңызға ие қала мәртебесін алғаннан кейін дамудың жаңа кезеңіне қадам басты. Ғылым мен білімнің, капитал мен өндірістің, мәдениет пен өнердің шоғырланған қаласында бүгінде тұрғындар саны 1,2 миллионнан асқан. Қала халқының өсіп, аумағының үлкеюі жалпы халықтың өмір салтының сапалық тұрғыда жаңа деңгейге көтерілуіне негіз болды. Сондықтан да қала тұрғындары мен қонақтары үшін мәдени орталықтың маңызы зор. Шымкент қаласының мәдени ошағының бірі де бірегейі — Көрме орталығы. Оның халыққа қызмет көрсетіп келе жатқанына биыл 10 жылдың жүзі болды. 10 жылда орталықта сан түрлі іс-шара мен көрерменді қызықтырған көрмелер өтті.
Замануи техникалармен жабдықталған орталық бір рет қайта жөндеуден өтті. Оған себеп – 2022 жылғы жаппай халық наразылығы. Қаңтар оқиғасы кезінде наразы топ аталмыш орталықтың күл-талқанын шығарып, келбетін танымастай қиратқан еді. Салдарынан Көрме орталығының есігі біраз уақытқа жабық болды. Бүгінде жаңа құрылыстан өткен бұл орталықтың көлемі — 2 мың шаршы метр.
«Көрме» орталығы Шымкент қаласының әкімдігі жанында, әкімшілік-іскерлік орталығы маңында орналасқан. Орталықтың негізгі қызметі мәдениет саласында көрмелер өткізуді қамтамасыз ету, халық-шаруашылық жетістіктері туралы білім мен ақпаратты насихаттау, тарату және жариялау болып табылады. Бүгінде орталықта өтіп жатқан іс-шаралар заманауи форматта айшықталып келеді.
2013 жылдан бері 378 көрменің 50-ден астамы халықаралық деңгейдегі іс шаралар. Ал қалғаны түрлі дәрежедегі бизнес-форум, жәрмеңке, бас қосулар. Көрме орталығында өткен жиындар Африка елдерінің, “HALAL EXPO “ , “Poneton” , «Worldskills», Иран Ислам республикасының, Өзбекстан республикасының, “AgriTekShymkent” халықаралық көрмелері жергілікті бизнес өкілдерінің әріптестік байланысына да жол ашып, мемлекеттер арасындағы ынтымақтастықты нағйтты.
Мекемеде өткізілетін ерекше жиындар өте көп. Соның бірі — “KAZDENTEXPO-ЮГ” халықаралық стоматологиялық көрмесі. Елдің ерекше қызығушылығын туғызған халықаралық көрнме жыл сайын тұрақты түрде өтеді. Бұл жерде келген қала тұрғындары денсаулықты жақсартуда пайдалы кеңестер алып, білікті мамандармен тілдесіп, кәсіпкерлер озық технологияларға негізделген әдіс-тәсілдерді кеңінен қолдануға мүмкіндік ала алады.
10 жылдық мерейтой қарсаңында Көрмеде Шымкент қаласы әкімдігінің қолдауымен Тәжікстан елінің құрылыс көрмесі және Түркия елінің брендтік киімдер көрмесі ұйымдастырылып, тауарлар халыққа тиімді бағада ұсынылатынын хабарлаймыз!
