Елімізде жаңа бизнес-идеяларды іске асыру үшін арнайы мемлекеттік гранттар берілген. Тиімді ұсынысты пайдаланып, кәсібін дөңгелетіп жатқан азаматтардың қатары толығуда.
Үшінші мегаполисте қайтарымсыз мемлекеттік грант иегерлері сан алуан кәсіпті дөңгелетіп, табыс көзін тауып отыр. Кәсіпкерлердің бірқатар жобаларын қалалық жұмыспен қамту және халықты әлеуметтік қорғау басқармасының ұйымдастыруымен өткен баспасөз турында таныстырылды.
Бағзы заманнан бері кәсіпке айналған істердің бірі — киіз басып, түрлі туындыларды жасау. Шымкенттік қолөнер шебері Мадина Ахметова киіз басып, текемет тоқуды кәсіп еткен. Оның киізден жасалған бұйымдары бүгінде АҚШ –та өтіп жатқан халықаралық көрмеге де қойылып, нарықта сұранысқа ие тауарлардың бірі. Көпбалалы ана түрлі бұйымдарын ұлттық нақыштағы ою-өрнектермен безендіріп, дайындап, кәсіп иесі атанған:
— Былтыр мемлекеттен қайтарымсыз грант алып, киіз басатын құрылғы сатып алдым. Мен үшін бұл үлкен көмек болды. Грант қаржысына алынған қондырғы жұмысымды жеңілдетіп, тауар түрлері мен көлемін арттыруға сеп болуда , — дейді.
Сондай-ақ қаламызда арболитті блок шығарумен айналысып, бүгінде қосымша екі азаматты жұмыспен қамтыған — Нұрымжан Шойбеков. Грант иегері қайтарымсыз қаражатқа құрал-жабдық сатып алған. Табысты еңбектің нәтижесінде өнім өндіру қуаттылығы артып, табысты болуда. Кәсіп иесінің айтуынша, құрылыс материалы экологиялық таза әрі өте тиімді. Нұрымжан Шойбеков — Шымкентте арболитті блокты шығаратын жалғыз өндіруші. Оның тауарына тапсырыс көбінесе қаламыздан емес, Алматыдан көп түсуде.
Жалпы, былтыр Шымкентте «2021-2025 жылдарға арналған кәсіпкерлікті дамыту» ұлттық жобасы шеңберінде 400 айлық есептік көрсеткішке дейінгі мөлшерде мемлекеттік грант иегері атанған 1096 азамат қазір өз қызметін салық органдарында тіркеп, есептерін тапсырып қойған. Саланың жауапты мамандары белгіленген қаражаттың мақсатты жұмсалуына қатысты ұдайы тексеру жүргізіп келеді.
Былтыр грант алған 893 азаматтың кәсібіне зерделеу жұмыстары жүргізіліп, 827 азамат жұмыс орнын ашқан. Соның арқасында бүгінде қосымша 25 азамат жұмыспен қамтылып отыр.
Биыл әлеуметтік осал топты азаматтарға арналған грантты 447 адамға беру жоспарланған. Жыл басынан бері өткізілген бірінші және екінші лекте 6 мыңға жуық азаматтан өтінім түсіп, 227-не оң шешім қабылданған.
