Білім беру жүйесін жақсарту — ұлт сапасын жақсарту. Қасым-Жомарт Тоқаев білім саласындағы олқылықтар мен атқарылар жұмыстарды үнемі қадағалап, білім беретін мекемелердегі жұмыстың қалай жүріп жатқанын назарынан тыс қалдырмайды. Жолдауда баса айтқан білім саласындағы тағы бір мәселе – орта білім жүйесін жетілдіру. Қасым-Жомарт Тоқаев халыққа арнаған Жолдауында: — Орта білімнің сапасы – табысты ұлт болудың тағы бір маңызды шарты. Әрбір оқушының білім алып, жан-жақты дамуы үшін қолайлы жағдай жасалуға тиіс. Сол үшін «Жайлы мектеп» ұлттық жобасы қолға алынды,-деген болатын.
Осы мақсатта Шымкенттегі №65 Ы.Алтынсарин атындағы мектеп-гимназиясы жаңа оқу жылында мектеп ұжымы мен оқушыларды жаңа оқу ғимаратымен қуанту үшін қосымша жапсаржай салынуда. Қазіргі уақытта 1251 орынға арналған №65 мектепте 3567 оқушы білім алуда. 600 орынға арналған қосымша оқу корпусын салудағы негізгі міндет — оқудың 1-сатысындағы оқушылар үшін оқу орындарының санын көбейту. Сайрам шағын ауданында орналасқан жаңа оқу ғимаратының құрылысы қалай жүріп жатыр? Осы сұрақты алға тартқан қала әкім Мұрат Әйтенов нысан басында болып, құрылыстың жай-күйімен танысты. Жалпы алаңы 5 мың шаршы метрді құрайтын құрылыс жұмысы кестеге сай жүргізіліп жатыр. Ғимарат үш қабатты, 2 блоктан тұрады, мұнда 0-4 сынып оқушылары оқытылады деп күтілуде. Жалпы оқу ғимаратында 25 оқу сыныбы бар, сыныптар 24 оқушыға шақталған. Мектептің бастауыш сынып бөлігінде 50 педагог сабақ беретін болады. Оқушыларға 220 орындық асхана және спортзал қамтылған. Сонымен бірге нысанның үшінші қабатында 16 оқу орны, 3 компьютер орны бар 10 мың кітап қорына арналған кітапхана, шахмат клубы қарастырылған. Қала басшысы жұмыстың күрделілігі мен маңыздылығын ескеріп, құрылыстың бекітілген кестеге сай аяқталуын тапсырды.
Мегаполистегі халықтың қажеттілігіне керекті тағы бір әлеуметтік нысан жөнделіп, қайта жаңғыруда. Ол — Еңбекші ауданына қарасты №5 қалалық емхана ғимараты. Күрделі жөндеуден өтіп жатқан нысанның алғашқы қабырғасы 1984 жылы қаланып, қолданысқа берілген. Емхананың алдағы уақытта инженерлік желілері түгел ауыстырылып, сыртқы қасбеті жаңартылады.
Мемлекет басшысы Қ.Тоқаевтың Қазақстан халқына Жолдауында үнемі мән беретін маңызды мәселелердің қатарында әлеуметтік инфрақұрылымды дамыту жайы бар. Іске асырылатын негізгі жұмыстың бірі болған құрылыстың басына қала әкімі Мұрат Әйтенов барып, жай-күйімен танысты. Шілде айының 1-інен басталған емхана құрылысының жұмыстары төрт айға созылады дейді жауаптылар. Амбулаториялық емханалық көмек көрсететін мекеме қазіргі уақытта 58 мыңнан астам тіркелуші тұрғынға медициналық қызмет ұсынып отыр. Сондай-ақ, мұнда 500-ден аса медицина персоналы қызмет етеді. Қаламыздағы қырық жылдық тарихы бар емхананың күрделі жөндеу жұмыстары қараша айында аяқталады.
