1 ШІЛДЕДЕН БАСТАП АХАТ ФУНКЦИЯЛАРЫ МЕМЛЕКЕТТІК КОРПОРАЦИЯҒА БЕРІЛДІ

Мемлекеттік корпорациясының қалалық филиалында неке және баланың туу туралы куәліктері салтанатты түрде табысталды.
Шымкенттік жас жұбайлар мен жаңадан ата-ана атанған азаматтарға естелік сыйлықтар табысталды. Дайын неке және баланың тууы туралы куәліктерін Мемлекеттік корпорация филиал директоры орынбасары Мария Турганбаева табыс етті.
Елорда күні қарсаңында, сондай-ақ, АХАТ функциялары «Азаматтарға арналған үкімет» мемлекеттік корпорациясына өтуіне байланысты бүгін тіркеуші органда неке қию және тууы туралы куәліктерді қуаныш иелеріне салтанатты түрде табыстау рәсімі өтті.
Естеріңізге сала кетейік, некені тіркеу туралы өтінішті бұрынғыдай, АХАТ бөліміне 15 күн алдын тапсыруға болады. Ал ата-аналар баласының туу туралы куәлігін алу үшін өтінішті проактивті қызмет SMS-хабарлама арқылы бере алады.
Бүгін некені тіркеу рәсімі АХАТ ғимаратында өтті. Жас жұбайларға «Азаматтарға арналған үкімет» мемлекеттік корпорациясының Басқарма Төрағасы Сүйеніш Әбділдиннің атынан құттықтау ашық хаты мен кәдесыйлар табыс етілді.
«1 шілдеден бастап АХАТ функциялары Мемлекеттік корпорацияға берілді. Міне, Елорда күні де жақындап қалды. Мереке қарсаңында біз жас жұбайларға және ата-ана атанған отбасыларды құттықтауды жөн көрдік. Мен өз тарапымнан отбасыларға құжаттарды тапсырғаныма өте қуаныштымын. Және осы құжаттар сіздерге жарқын өмірге жол ашсын. Сіздерді біздің үлкен корпорациямыздың атынан осы айтулы күндеріңізбен шын жүректен құттықтаймын. Әр отбасына ұзақ әрі бақытты өмір және салиқалы ұрпақ тәрбиелеуді тілеймін»,- деді филиал директоры орынбасары Мария Турганбаева жас жұбайларға арнаған сөзінде.
Естеріңізге сала кетейік,АХАТ қызметтерін тек тіркеуші органның қызметкерлері көрсететін болады. Мемлекеттік корпорация қызметкерлерінің, оның ішінде ХҚКО операторларының АХАТ ақпараттық жүйесіне қол жеткізу мүмкіндігі болмайды.
Мемлекеттік қызметтерді көрсету, атап айтқанда туу мен өлімді тіркеу бойынша қызметтерге төлем ақы алынбайды. Ақылы қызметтерге келетін болсақ, Мемлекеттік корпорация ҚҚС төлеуші болып есептеледі. Сондықтан қосымша құнына салық қосылатын болады.