ӨРТТЕН САҚТАНУ ӨМІР ҮШІН МАҢЫЗДЫ

Шымкент қаласы Төтенше жағдайлар департаментінің мамандары кезекті тактикалық оқу-жаттығу өткізді. Жоспарлы жұмыс «Бал текстиль» тоқыма фабрикасы ғимаратында болды. Өртсөндірушілердің кәсібилігі мен фабрика қызметкерлерінің оқыс оқиғаға дайындығы тексеріліп, қауіпсіздік ережелері пысықталды.Қалалық төтенше жағдайлар департаментінің мамандары айына екі немесе үш рет дәл осындай тактикалық оқу-жаттығу өткізіп тұрады. Әсіресе, өрт пен жарылу қаупі бар ғимараттарда. Мақсат — қызметкерлердің оқыс оқиға орын алған жағдайда өзін-өзі ұстай алып, дұрыс әрекеттер жасауы үшін. Жаттығуға 8 техника, 54 қызметкер жұмылдырылып, жоспар сәтті аяқталды.«Бал текстиль» тоқыма фабрикасының жалпы аумағы 6 гектар. 450 азамат жұмыс жасайды. Өрт кауіпсіздігіне аса жауапкершілікпен қарайтын мекеме басшылығы қызметкерлерге өрттен сақтану ережелерін үнемі түсіндіріп, арнайы маман бекітіп қойған. Одан бөлек жыл сайын Төтенше жағдайлар департаментімен бірлесіп, оқу-жаттығу жұмыстарын тұрақты жүргізеді екен.
Өрт — тілсіз жау. Қай кезде боларын болжап білу мүмкін емес. Егер сіздің өміріңізде осындай төтенше жағдай орын алса сіз өзіңізді және жақындарыңызды оттан құтқаруға дайынсыз ба? Өрт сөндіруші мамандардан бөлек, әр адам өз өмірі үшін жауапты.

Айғақ-ақпарат