Нұрсұлтан Назарбаев Қазақстан Тәуелсіздіктің 25 жылдығына арналған монументті ашты, — деп хабарлайды Tengrinews.kz тілшісі.
Елбасы қазақстандықтарды мерекемен құттықтады. «Құрметті астаналықтар, жерлестер. Бүгін Тәуелсіздіктің 25 жылдығы, баршаңызды ортақ мерекемен құттықтаймын!», — деді Назарбаев.
Президент монументтің EXPO-2017 аумағында орналасуының ерекше мәні барын атап өтті.
«EXPO-2017 аумағында орналасуы түсінікті. Келесі жылдан бастап әлемнің әр түпкірінен миллиондаған адам келіп, көрмені тамашалайды. Әрине, олар осы монументті көріп, Қазақстанның 25 жылға толғанын есте сақтап жүреді», — деді Елбасы.
«Бұл монумент көкке ұмтылып тұр. Қазақстанның дамыған 30 елдің қатарына кіру ұмтылысы сияқты. Біздің өрлеуге ұмтылысымызды бейнелейді», — дейді Мемлекет басшысы.
Еске салайық, былтыр желтоқсан айында Қазақстанның Тәуелсіздігінің 25 жылдығына арналған монументтің үздік сызба-идеясының жеңімпаздары анықталған болатын. Конкурстың қорытындысы бойынша, бірінші орынды алматылық Еділ Әлімбев жеңіп алған еді.
Идея авторының түсіндіруі бойынша, көкке ұмтылған стелланың 25 қыры бар. 25 қыр — Тәуелсіздіктің 25 жылын білдіреді.
Дереккөз: Kaz.tengrinews.kz
