«Қайрат Шерәліұлы Беркінбаевтың кенеттен жүрек соғуы тоқтап, өмірден озды»-деген суыт хабар қазақстандықтарға, оның ішінде жерлестеріме ауыр тиді. Ол- Созақ ауданының тумасы еді. Елін, туған жерін сүйетін абзал азамат туып-өскен «Қызылкөл» ауылында мектеп пен «Қайрат» атты балабақшаны өз қаражатына салып, мемлекетке өткізгенде тұрғындардың осындай қамқор жанды тәрбиелеп өсірген ата-анаға алғысын жаудырғанының куәсімін…
Мұқтаж жандардың жанынан табылып, қолынан келгенше көмегін аямаған Қайрат Шерәліұлы облыстағы әлеуметтік қолдаудағы және қайырымдылық пен демеушілік ісіндегі елеулі үлесі үшін ОҚО әкімдігінің «Қамқор» сыйлығымен, мәдени және гуманитарлық саладағы қайырымдылық және демеушілік қызметі үшін ҚР Президентінің Құрмет Дипломымен марапатталып, мемлекеттік наградалар «Парасат» орденін, Тәуелсіздік күніне орай, ІІІ дәрежелі «Барыс» ордендерін кеудесіне таққанда «Награда иесін тапты»- деп қуанғандардың бірі болдым.
Көп ұзамай Қайрат Шерәліұлы Білім министрінің шешімімен «Қазақстан Республикасының білім беру ісінің құрметті қызметкері» атағы берілді.
Иә, біз әріптес болдық. Ол 2007 жылдан 2011 жылға дейін Оңтүстік Қазақстан облыстық мәслихатының төртінші шақырылымдағы депутаты болып, Созақ ауданынан сайланды. Халық қалаулысы ретінде халықты мазалаған мәселелер төңірегінде тынбай еңбек етіп, оның шешімін табуға атсалысты…
Қайрат Беркінбаев 2009 жылы Алматы қаласынан 17 шақырым жерде орналасқан Талғар ауданындағы «Табаған» тау-шаңғы курортында бір топ оңтүстікқазақстандық журналистердің демалуына және 2011 жылғы 30 қаңтар мен 7 ақпан күндері аралығында VII Қысқы Азия Ойындары «Табаған» тау-шаңғы курортында дүркіреп өтуіне демеушілік жасаған еді. 2011 жылдан бастап ҚР Президенті Іс басқармасы жүйесінде қызмет атқарды.
2004 жылдан бастап «Казнефтехим» АҚ Бас директорының орынбасары, өмірінің соңына дейін Қазақстан Республикасы Президенті Іс Басқармасы Медициналық орталығының «Оқжетпес» ЕСК» АҚ президенті болды.
Қайрат Шерәліұлы елімізде шипажай-курорт ісініңің дамуына сүбелі үлес қосып, өзін дарынды, ұйымдастырушылық қабілеті зор азамат ретінде танытты.
Қайрат Шерәліұлының адамгершілік, ізгілік, қайырымдылық қасиеттерінен туындаған игі істері, азаматтық жарқын бейнесі ел есінде мәңгі сақталады. Ол- ел қамын ойлаған асыл азамат еді.
Қайрат Шерәліұлы Беркінбаевтың мезгілсіз қайтыс болуына байланысты отбасы мен туған-туыстарының қайғысына ортақтасып, көңіл айтамын.
Дулат ӘБІШ
