Төккен тер мен адал еңбектің жемісі — “Алтын күз” мерекесі өтті, деп хабарлайды «Айғақ» телеарнасынның тілшісі. Ордабасы ауданы ауыл шаруашылығы саласы бойынша қамбасын астыққа толтырып, ағымдағы жылды жақсы көрсеткішпен аяқтап отыр. Бұл, әрине, күннің ыстығы мен ызғарына қарамай, тынымсыз тірлік атқарған еңбек адамдарының арқасында. Шаруалардың бір сәт демін алып, бой жазатын алтын күз мерекесін ордабасылықтар да атап өтті.
Ордабасы ауданында ауыл шаруашылығы еңбеккерлерінің дəстүрлі «Алтын күз» мерекесі тойланды. Ерте көктемнен егін басына шығып, ала жаздай дала төсінде тер төккен шаруалар қоңыр күзде көл-көсір өнім жинап, адал мехнатының жемісін Темірлан елдімекеніндегі ортағлық алаңда ұйымдастырылған жәрмеңкеге қойды.
“Алтын күз — 2022” мерекесінде ауыл шаруашылық өнімдерінің жәрмеңкесі, шаруашылық техникасы мен асыл тұқымды малдардың көрмесі ұйымдастырылды. Аудан әкімі аллымен 10 ауылдық округ еңбеккерлердің еселі еңбегімен танысып, шаруасының жайын біліп шықты. Бұл күні азық-түлік тауарларының бағасы негізгі нарықтан 10-15% жеңілдікпен сатылды.
Ауыл шаруашылық дақылдарын түрлі зиянкестерден тазартуда — химиялық заттардың маңызы ерекше. Шаруалардың басты әлегі де егістік алқабын арам шөптен тазарту, қауіпті шегірткелермен күресу емес пе?Тоқшылық пен молшылықтың мерекесін аудан әкімі Нұрбек Бадырақов ашып, еңбек ардагерлері мен шаруашылықтың шамын жағып жүрген халықты мерекемен құттықтады.
Ордабасы ауданының жұртшылығы жиналған мерекеде еңбек ардагерлері, өз еңбегімен жоғары нәтиже көрсеткен шаруа қожалықтары, үш жақты келісімге сəйкес шаруашылықтың барлық салаларында жетістікке жеткен ауылдық округ əкімдері мен еңбек озаттары марапат төрінен көрінді. Төрткүл, Қажымұқан, Бадам ауылдық округі мүмкіндігі мен ерекшелігі, басым бағыттар бойынша жоспарды артығымен орындап, жүлделі орынға ие болды.
Жалпы, 2022 жылдың 9 айында ауданның ауыл шаруашылық саласында 53 миллиард 818 млн теңгенің өнімі өндіріліп отыр. Бұл өткен жылдың тиісті кезеңімен салыстырғанда 3 миллиард 446 миллион теңгеге артық. Салаға жауапты басшылар жылдың қорытындысымен 73 миллиард 200 миллион теңгенің өнімін өндіреміз деп жоспарлап отыр.
Бейнетінің зейнетін көріп жатқан шаруалардың шаттыққа толы тойы мерекелік шараға ұласты. Аудан халқы да қуаеышты күнде қары қалмай, еңбек адамдарына алғыс білдірді.Елдің ырысын арттырып жүрген еңбек адамдары бүгін өз еңбектерінің жемісін көріп, халықтың алғысына ие болды.
