Шымкенттік жастардың арасында «IQ ZHASTARY» интеллектуалды ойыны өтті. Топтық ойында командалар білім мен біліктілік, тапқырлық пен шапшаңдық бойынша сынға түсті. Логикалық сұрақтарға жауап беріп, қатысушылардың зияткерлігі сарапқа салынды.
ҚР Конституция күніне орай, Жастар ресурстық орталығының ұйымдастыруымен өткен бүгінгі бәсекеге 100-ден астам өтінім келіп түскен. Сайыстың іріктеу кезеңінен финалдық ойынға 24 қатысушы жолдама алды. Ойынның мақсаты- қаламыздағы жастардың білімге, оқуға деген құлшынысын арттырып, шапшаңдықтарын шыңдау.
Тартысты бәсеке барысында қатысушылардың ой-өрісі шыңдалып, зияткерлігі сарапқа салынды. 8 команда бақ сынасқан зияткерлік ойынның ережесіне сәйкес, әр топта 3 қатысушы болады. Екі топ кезек бойынша қалаған ұяшығын таңдап, түрлі бағыттағы сауалдарға дұрыс жауап беруі тиіс. Әр дұрыс жауап үшін команда қоржынына 1 ұпайдан қосылып отырады.
