Қоғамдық қабылдаудағы халықтың мәселесі жауапсыз қалмайды. Түркістан облыстық мәслихатының депутаты, «Amanat» партиясының мүшесі Дулат Әбіш Ордабасы ауданында тұрғындарды қабылдап, халық үніне құлақ түрді. Кездесуге жазылған азаматтардің бірі жеке мәселемен келсе, бірі әлеуметтік инфрақұрылымға қатысты өтінішін жеткізді.
Осыған дейінгі кездесуде Қажымұқан атындағы №1 балалар мен жасөспірімдер және №2 спорт мектебін газдандыру жайы көтерілген болатын. Табиғи отынға қолы жеткен мектеп директорлары алғысын айтып, тарихта аты қалған спортшылар шыққан ауданнан заманауи спорт залын салу бойынша ұсыныс айтты.
Бұқаралық спортты дамытуға жіті көңіл бөлінуде. Кәсіби спортпен шұғылданатындарға жергілікті жерінен заманауи нысан бой көтеруі керек. Мамандардың ұсынысын тыңдаған мәслихат депутаты ол бойынша тиісті құжатты әзірлеуін сұрап, жобалық-сметалық құжаттамаға сәйкес жауапты басқармаға депутаттық сауал жолдайтынын жеткізді.
Жеке мәселесімен келген Темірлан ауылының тұрғынын тыңдап, айтқан өтініші бойынша тиісті мамандарға хабарласып, қажетті ақпаратын сұрады.
