1,9 МЛН ТЕҢГЕ БЮДЖЕТКЕ ҚАЙТАРЫЛДЫ

Қызметте шеніңіз өсуі үшін біліктілікті арттырғаныңызды растайтын құжат керек. Бірақ, ол анықтамаға амалын тауып, пара беріп қол жеткізетіндер де бар екен. Шымкентте ауыр атлетика және тағы басқа спорт түрлері ұйымдарының 19 жаттықтырушысы және 13 әдіскерінің құйтырқы әрекеттері жүзеге аспады. Олардың жалған құжаттар негізінде алған анықтамалардың күші жойылды.

Бұл ақпаратты Сыбайлас жемқорлыққа қарсы іс-қимыл Агенттігі Шымкент қаласы бойынша департаментінің басшысы брифинг барысында баяндады. Қанат Сүлейменовтың айтуынша жалған құжаттар негізінде «Біліктілігі жоғары деңгейдегі бірінші санатты жаттықтырушы» және «Біліктілігі жоғарғы деңгейдегі әдіскер» анықтамаларының күші жойылды. Сондай-ақ, негізсіз үстемақы үшін төленген 1,9 млн теңге бюджетке қайтарылған.

Атқарылған жұмыстарды баяндаған Қанат Сүлейменов басқа салалардағы олқылықтарға да тоқталды. Ол құрылыс саласында да профилактикалық іс-шаралар жалғасып жатқанын айтады. Бүгінде Департаментпен құрылысы аяқталмаған 4 нысанды бақылауда.Сондай-ақ, жұмыспен қамту саласы бойынша отбасының еңбекке қабілетті мүшелері салықтық есептен шығарылған кәсіпкерлерден жұмыс орны туралы бұйрықтар мен анықтамалар алған 199 жағдай анықталған. Осы атаулы әлеуметтік көмек алушыларға 49,6 млн теңге төлеген. Сонымен қатар, Бағаны көтеру тұрғысынан Департамент мемлекеттік сатып алу жоспарларына мониторинг жүргізеді. Тек ағымдағы жылы 6 млрд теңгеден астам қаражат үнемделгенін айтады.