ШАХМАТТАН ӘЙЕЛДЕР АРАСЫНДАҒЫ ГРАН-ПРИ АЯҚТАЛДЫ

Шымкентте Халықаралық шахмат федерациясының және Freedom Holding корпарациясы компаниясының қолдаумен KazChess/Қазақстан шахмат федерациясы ұйымдастырған беделді турнир – әйелдер арасындағы 2024-2025 жылғы ФИДЕ Гран-приінің екінші кезеңі аяқталды. 9 турдың нәтижесі бойынша ФИДЕ туы аясында қатысқан Александра Горячкина бәрінен басым түсті. Одан жарты ұпай аз жинаған әлемнің экс-чемпионы Тань Чжунъи екінші орынға шықты. Қазақстанның әйелдер құрамасының көшбасшысы, 45-ші Дүниежүзілік шахмат олимпиадасының күміс жүлдегері Бибісара Асаубаева Тбилисиде өткен 1-ші кезеңдегідей жүлдегер атанды, бірақ бұл жолы ол 3-ші орынды иеленді.

— Турнир ұйымдастыру жағынан өте жақсы өтті. Бірақ турнирдің өзі мен үшін қиын болды. Бірінші таймда жақсы ойнадым. Екіншісінде, өкінішке орай, ауырып қалдым. Аздап шаршап қалғаным бар. Сондықтан келіп тұрған мүмкіндікті қолдан жіберіп алдым десем де болады. Бірақ, бақытымызға орай, турнир оң нәтижемен аяқталды. Мұнда мен Катерина Лахнодан жеңіліп қалдым. Онымен қоса турнир жеңімпазы Александра Горячкинамен де күрделі партия болды. Мұнда барлығы жақсы ойнаған соң, біреуін бөліп жарып мықты ойнайды деп айта алмаймын. Себебі бұл жерде тек мықтылар ғана жиналған. Ал осы жылдың соңына қарай мен Нью-Йоркте өтетін рапид және блиц бойынша әлем чемпионатына барамын, деді Халықаралық гран-при турнирінің қола жүлдегері Бибісара Асаубаева.

 Жарыстың қорытынды шарасына Шымкент қаласы әкімінің бірінші орынбасары Қуаныш Асылов, KazChess бірінші вице-президенті, Freedom Holding Corp.  команиясының өкілдері, танымал кәсіпкерлер мен беделді тұлғалар қатысты. Әйелдер арасындағы ФИДЕ Гран-при – ақшалай жүлдесінің қомақты болатынымен ерекшеленетін турнир. Алты кезеңнің әрқайсысының қоры 80 000 еуроға тең, бірінші орын алған шахматшыға оның 18.000 еуросы табыс етіледі, екінші орынның жүлдесі – 13.000 еуро.Бүкіл турнир сериясының жалпы жүлде қоры –рекордтық $600 000 долларды құрайды. Классикалық шахмат ойынына қатысқан шахматшы тек ақшалай жүлдемен ғана емес, сонымен қатар өзінің рейтингін жоғарылату мүмкіндігіне ие болады. Бұған қоса серияда жеңіске жеткен жағдайда әлемдік шахмат тәжін иеленуге жол ашылатын келесі үміткерлер (FIDE Women’s Candidates 2026) турниріне жолдама алуға болады.