Қазақстан ажырасу көрсеткіші бойынша әлемде екінші орында тұр. Сондай-ақ, елімізде жыл сайын тұрмыстық зорлық – зомбылықтан зардап шегетіндер саны да артып келеді. Осыған орай, қоғамның назарын дұрыс өмір салтын қалыптастыруға аудару мақсатында үшінші мегаполисте «Отбасындағы зорлық-зомбылықсыз Қазақстан» жобасы аясында жастармен кездесу өтті.
Шымкент қаласының ішкі саясат және жастар істері жөніндегі басқармасының ұйымдастыруымен қоғамның назарын зорлық-зомбылықсыз өмір салтын қалыптастыруға аудару мақсатында шаһарымызда тележүргізуші, қоғам қайраткері Ләйлә Сұлтанқызымен «Отбасы бақыты өз қолыңда» тақырыбында кездесу ұйымдастырылды. Кездесуге әйелдер істері және отбасылық-демографиялық саясат жөніндегі комиссия мүшелері, Шымкент қаласы Ішкі саясат және жастар істері жөніндегі басқармасының басшысы, сондай-ақ, әйелдерді зорлық-зомбылықтан қорғау тобының аға инспекторы қатысты. кездесуде қаламыздың жастары да белсенділік танытып, мазалап жүрген сауалдарына жауап алды.
Іс-шара барысында қатысушылар тұрмыстық зорлық-зомбылық мәселелерін жан-жақты талқылап, оның қоғамдағы теріс салдарын азайту, алдын алу және жою бойынша пікір алмасты. Ләйлә Сұлтанқызы жастармен ашық сұхбат құрып, қоғамдағы зорлық-зомбылықсыз мәдениетті дамытудағы әр адамның рөліне назар аударды. Сондай-ақ, іс-шарада жастардың санасына зорлық-зомбылықсыз өмір салтын қалыптастырудың маңыздылығы және қоғамда белсенді азаматтық ұстанымды ұстану қажеттілігі туралы айтылды.
