Елімізде Мемлекет басшысының тапсырмасымен «Жайлы мектеп» ұлттық жобасы іске асырылуда. Бұл жоба оқу орындарының тапшылығы, апатты мектептер және үш ауысымды оқыту мәселелерін шешуге бағытталған. Жоба бойынша ел аумағында 2024 жылы 416 мың орындық 217 мектеп, ал 2025 жылы 279 мың оқушыға арналған 152 оқу орны салынады деп жоспарлануда. Сонда 2025 жылдың соңында 740 мың оқушы орнына арналған 369 мектеп салынып бітуі керек. Негізгі басымдық қала мен ауылдық мектептер арасындағы алшақтықты азайтуға бағытталған. Осылайша, салынған білім нысандарының жартысына жуығы ауылдық жерлерде орналасады екен. Жаңа форматтағы мектептерде бастауыш және жоғары сынып оқушылары үшін бөлек блоктар қарастырылады. Сондай-ақ, ерекше білім беру қажеттіліктері бар балалардың кедергісіз жүріп-тұруына мүмкіндік жасалып, оқу орындарын жобалау кезінде арнайы жеделсаты, баспалдақ, оқу сыныбы ескеріледі. Жайлы мектептерде заманауи техникалық құрал-жабдықтар орнатылып, қауіпсіздік шараларын арттыруға ерекше назар аударылады. Атап айтқанда цифрлық бейнебақылау, дабыл түймесі және дыбыстық хабарлау, есіктер мен блоктарды автоматты түрде құлыптау, лицензияланған күзет мұғалімдер мен оқушылардың қауіпсіздігі үшін қызмет етеді.
Аталмыш жоба туралы алдымен Мемлекет басшысының Жолдауында айтылды. «…Жайлы мектеп» ұлттық жобасы қолға алынды. Біз 2025 жылға дейін 800 мың баланың заманауи мектепте оқуына жағдай жасаймыз. Осылайша, апатты жағдайдағы және үш ауысыммен оқитын мектеп мәселесін толық шешеміз. Бұл ауыл және қала мектептерінің айырмашылығын едәуір азайтады. Жалпы, мектеп салу Үкімет және әкімдіктер үшін басты міндеттің бірі болуы керек. Жемқорлар сотталғанда, олардың заңсыз тапқан қаржысы мемлекетке өтіп, түгелдей мектеп құрылысына жұмсалуға тиіс. Үкімет осы бастаманы заң тұрғысынан рәсімдеу туралы шешім қабылдауы керек» делінген Жолдауда.
Ұлттық жоба аясында шаһарымызда алғашқы екі жайлы мектептің техникалық ашылуы өтті. Бұл мектептер құжаттары толық дайын болғаннан кейін, оқу жылының екінші тоқсанынан бастап қолданысқа беріледі деп жоспарлануда. Мектептерді аралау кезінде Шымкент қаласының әкімі тұрғындарды осынау айтулы қуанышпен құттықтай отыра, оқу орны тапшылығы мәселесі ұзақ жылдар бойы өзекті болғанына тоқталды. Техникалық ашылуы өткен Нұршуақ шағынауданындағы жаңа білім беру ғимараты 2000 оқушыға, ал Қарабастау тұрғын алабындағы мектеп 1200 орынға есептелген. Бастауыш және жоғары сынып оқушылары үшін жеке блоктары бар заманауи мектептерде балалардың сапалы білім алып, жан-жақты дамуына жағдайлар жасалған. Жайлы мектептерде хореографиялық кабинет және төрт спорт залы, демалыс аймақтары, воркаут және нетворкинг бар. Сонымен қатар, түрлі заманауи пәндік кабинеттер, STEM-зертханалар, робототехника сыныптарымен жабдықталған. Жоспар бойынша жыл соңына дейін Шымкент қаласында 11 жайлы мектеп қолданысқа беріледі екен. Ал жалпы ұлттық жоба аясында шаһарымызда 18 жайлы мектеп ашылуы керек.
