Шымкент қаласы жұмыспен қамту және әлеуметтік қорғау басқармасына қарасты «Белсенді ұзақ өмір сүру» орталығында қызмет алушы зейнеткерлер арасында түрлі спорт түрлерінен жарыс өтті. Орталық зейнеткерлерді салауатты өмір сүруге шақырып, өмірге деген құштарлықтарын арттыру мақсатында апта сайын түрлі іс-шаралар өткізеді. Бұл жолы ұйымдастырылған басекеде бақ сынасуға оншақты қызмет алушы ынта білдірген. Үздік ойын өрнегін көрсеткен қатысушылар марапатталып естелікке сыйлықтар алды. Қызмет алушылар бәсекеде ойлау қабілеттерінің ұшқыр екенін дәлелдеп, қарсылатарына дес бермей жеңімпаз атану үшін барын салды.
Бұл орталықтың негізгі мақсаты – егде жасына байланысты өзіне қызмет көрсетуге мүмкіндігі жоқ қарттарға және зейнет жасына жеткен азаматтарға, сонымен қатар зейнет жасына жетіп, денсаулық жағдайына байланысты емге мұқтаж қарттарға жартылай стационарлық жағдайда қызмет көрсету.
Орталықтың үш қабатты ғимараты заманауи тұлғаға қажетті барлық жағдаймен қамтамасыз етілген. Интернет-кафе, емдік-уқалау, физикалық-емдеу бөлмесі, кинозал, кітапхана, тренажер залы, йога, үстел теннисі, бильярд залдары және балаларға арналған ойын бөлмелері бар. Орталық тәуліктің күндізгі 4 сағат уақытында 70 қартқа арнаулы әлеуметтік және медициналық қызметтер көрсетеді. Барлық қызмет тегін екен.
Бұл күні зейнеткерлерге арнап концерттік бағдарлама қойылып, қариялар би биледі. Өздеріне көрсетілген қамқорлықты сезініп, бір жасап қалды.
