Көшпелі кездесу Тұран шағын ауданынан басталды. Жиналған халықтың басым бөлігін тұрғын үй мәселесі, жол жағдайы, жылу жүйесі мен аудандағы көгалдандыру мәселелері алаңдатады екен. Сондай-ақ, аудандағы мектеп пен балабақша жағдайы да мәз емес деген ата-аналар білім басқармасы жұмысына жауапкершілікпен қараса екен дейді. Кездесуде жарықтандыру мәселесі де қозғалды. Аталмыш шағын аудан жаңа болғандықтан көшелер толық жарықпен қамтылмаған, сол себепті жол апаты болу ықтималдығы өте жоғары дейді тұрғындар. Сонымен қатар, халық қоғамдық көліктер де аз жүреді деп шағымданды. Қала әкімінен Тұранға қарай қосымша автобустар жүргізуін сұрады. Ғабит Сыздықбеков бұл мәселені Шымкент қаласының жолаушылар көлігі және автомобиль жолдары басқармасына тапсыратынын жеткізді.
Бұдан кейінгі кездесу Нұртас шағын ауданында өтті. Жиынға ауданның ақсақалдары түгел келіпті. қала әкімін жақсы қарсы алған тұрғындар кезекке тұрып, Нұртастың кем-кетіктерін жеткізе бастады. Мұнда да газ мәселесі өршіп тұрған көрінеді. Қозғалған мәселелер мен айтылған өтініш-тілектер толық хаттамаға енді. Ғабит Сыздықбеков әр проблема назардан тыс қалмай, заң аясында шешілетін болады деді. Жиын соңында аудан халқы әкімге ризашылықтарын айтып, бата берді.
