ЖАСАНДЫ ИНТЕЛЛЕКТІНІҢ ЖУРНАЛИСТИКАДАҒЫ МАҢЫЗЫ

Қаржылық сауаттылық бүгінгі күннің негізгі тақырыбы. Халықтың осы тұрғыдан сауаттылығын арттыруда іскерлік журналистика маңызды рөл атқарады. Осы мақсатпен мегаполисте семинар-тренинг өтті. Онда цифрлы қоғамдағы жаңашылдықтар, қаржылық және құқықтық сауаттылық бойынша сала мамандары тәжірибесімен бөлісті.

Қазіргі таңда журналистер ақпарат беруде нақтылық, шапшаңдықтан бөлек, цифрлы технологияның мол мүмкіндіктерін де қолданады. Өйткені, уақыттың талабы осыны қажет етеді. Журналистердің кәсіби біліктілігін арттыру мақсатында Шымкентте «Түркітілдес журналистер қоры» қоғамдық қорының бастамасымен және «Halyk Bank» акционерлік қоғамының серіктестігімен “Іскерлік журналистика: қаржылық сауаттылық” атты семинар-тренинг өтті. Тренингте журналистер білікті мамандардан жасанды интеллект деген не, оны іскерлік журналистикада қалай қолдануға болады және афишаны қалай дайындауды, инфографиканы құрастырудың оңай жасау тәсілдері мен басқа да сауалдарға жауап алды. Қоғамдық қордың президенті Нәзия Жоямергенқызының айтуынша бұл тренинг еліміздің 6 өңірінде өтеді. Бұл семинарға қатысқан ақпарат саласының өкілдері жасанды интеллектті медиада қалай пайдалануға болатынын тәжірибе жүзінде көрді.

Сондай-ақ семинарда «Halyk Bank»-тың қызметкерлері «Интернеттегі алаяқтық. Алдын алу жолдары» тақырыбында баяндама жасап, алаяқтарға алданып қалмау, егер азаматтар мәселеге тап болса оны қалай шешуге болатыны жөнінде масс-медиа өкілдеріне ақпарат берді.

Түркітілдес журналистер қорының Қазақ тілді журналистердің аудиториясына ұйымдастырған бұл семинары кәсіби біліктілікті арттыруға мол мүмкіндік берді.