Мегаполисте Орта Азиядағы ең үлкен өндіріс орны іске қосылды. 32 гектар аумақты алып жатқан кәсіпорын Қытай инвесторының есебінен жүзеге асып отыр. Керамогранит өндіретін инвестициялық жоба құны 25,5 млрд теңге. Өндіріс зауытының алғашқы кезеңінің өзі жыл сайын 12,7 млн шаршы метр өнім шығаруға қауқарлы. Ал, екінші кезең іске қосылғанда өнім қуаттылығы екі есеге ұлғайып, 350-ден астам қосымша жұмыс орны ашылмақ.
Шымкент қаласы «Жұлдыз» индустриялды аймағында ірі инвестициялық жобаның бірінші кезеңі өз жұмысын бастады. Зауыттың құрылысы өткен жылы басталып, аз уақыттың ішінде отандық нарық сұранысының үштен бір бөлігін қамтуға қауқарлы өндіріс орнына айналды. Кәсіпорынның ашылу салтанатына қала әкімі Ғ.Сыздықбеков пен «WAN SHENG CERAMIC» шетелдік компаниясының құрылтайшылары қатысты.
Бұл ретте «WAN SHENG CERAMIC» ЖШС құрылтайшысы жобаны жүзеге асыруда көрсеткен көмегі мен белсенді қолдауы үшін қала әкімдігіне алғысын білдірді. Оның айтуынша, компания заманауи технологияларды енгізумен қатар, қызметкерлерді дамытуға арналған түрлі бағдарламаларды жүзеге асыруды көздеп отыр.
Мамандар бұл жобаны іске асыру құрылыс саласын дамытуға ғана емес, заманауи өндірісті енгізуге, жаңа жұмыс орындарын ашуға да септігін тигізетінін айтады. Сондай-ақ, өндіріс барынша қауіпсіз әрі экологиялық таза болмақ.
Айта кетейік, кәсіпорынның екінші кезеңі іске қосылғанда ішкі нарықты керамикалық плиталармен толық қамтамасыз етпек. Сондай-ақ, шет елдерге де экспортталады деген жоспар бар.
