Ж.ШАНИН ТЕАТРЫ ЖАҢА МАУСЫМЫН АШТЫ

Ж.Шанин театрының 96-шы маусымы ашылды. Өнер сүйер қауым үшін Шыңғыс Айтматовтың “ Ақ кеме” драмасы сахналанды. Сонымен қатар, конференция ұйымдастырылып, мәдени орынның басшысы келген қонақтардың сұрақтарына жауап берді. Халықтың үлкені мен кішісі бас қосқан жиында Шымкент қаласы әкімінің орынбасары Сәрсен Құранбек сөз сөйлеп, театр әртістерін құттықтады.

Шығармашылық ұжым жазушы Шыңғыс Айтматовтың “Ақ кеме” пластикалық қойылымын сахналады. Бұғы ана мен тылсым табиғаттың ұлылығын сезініп, адам болып қалудың жолы мейірім екенін ұғындыратын қойылым көрерменге ұсынылды. Драма өмірдегі қиындықтар мен отбасының бақытсыздығын суреттейді.

Спектакльге Алматы қаласының өнерпаздары да атсалысты. Театр — өмірлік мәселелерді шешудің жоғарғы сатысы, адамның бар жан-дүниесін бір қойылым арқылы ақтарып, әрбір тұлғаға ой салып, керек кезінде тәрбие беретін сондай бір жұмбақ мекен. Мәдениет пен рухани әлемді театрсыз елестету мүмкін емес. 95 жылдық тарихы бар театр ұжымы кейіпкерлердің жан тебіренісін іс-әрекетпен үнсіз қимылмен суреттеді.

Ақ кеме драмасы көпшіліктің көңілінен шықты. Қуантарлығы қойылымды тамашалауға келген жастардың қатары көп. Қойылым — табиғат аясында болып жатқан адам мен тылсым күш арасындағы тартылысты көрсетті. Сюжеті қиын спекталь көрерменге ой салғаны анық.