Үнемделген қаржы әлеуметтік қамтамасыз ету саласына қайта бағытталады. Бұл туралы Түркістан облыстық мәслихатының тұрақты комиссиясының отырысында айтылды. Сонымен қатар, облыстағы маңызды мәселелер қаралып, барлық сала бюджеті сараланды.
Білім саласынан артылған қаржы түгелдей «Жайлы мектеп» жобасына жұмсалады. Түркістан облысында биыл құрылысы аяқталуы керек 29 жайлы мектеп бар. Білім беру саласынан үнемделген 6,9 млрд теңгенің 1 млрды аталған мектептерді инфрақұрылыммен қамтамасыз етпек. Ал медициналық мекемелердің материалдық базасын нығайтуға 809 млн теңге жұмсалмақ. Сондай-ақ, денсаулық сақтау саласындағы 135 жедел жәрдем көлігінің қызмет сапасының артуына 88,9 млн теңге қарастырылуда. Бұл туралы облыстық экономикалық және бюджеттік жоспарлау басқармасының басшысы айтты.
Тұрақты комиссия отырысына 14 депутат қатысты. Жиын барысында экономикалық және бюджеттік жоспарлау басқармасының басшысына ауыл шаруашылығы, жылыжай, табиғи газ, абаттандыру және білім беру саласындағы үнемделген қаржының дұрыс жұмсалуы, жол мәселесі, ауыз су, сонымен қатар Ордабасы тауындағы үш бидің ескерткіші мәселесі қозғалды. Айта кетейік ескерткіш құрылысы 2018 жылдан бері тоқтап тұр. Тарихы терең құнды жәдігердің қараусыз қалғаны жайлы осыған дейін облыстық мәслихат депутаты жоғарғы билік өкілдерінің назарына ұсынған. Бірақ, әзірге атқамінерлерден тұшымды жауап жоқ.
Сонымен қатар отырыс барысында облыс әкімдігі жанындағы сыбайлас жемқорлыққа қарсы іс-қимыл жөніндегі ведомствоаралық комиссияның дербес құрамына өзгерістер енгізу жайы талқыланды.
