Ауылдағы денсаулық сақтауды жақсарту мақсатында облыста 49 нысан салу жоспарлануда. Осы саладағы материалдық-техникалық жабдықтармен қамтамасыз ету үшін 300 млн теңге қаржы қаралып отыр. Бұл туралы Түркістан облыстық мәслихатының тұрақты комиссиясының отырысында айтылды. Кәсіпкерлік, құрылыс, инфрақұрылымды дамыту, жер қатынастары және табиғатты пайдалану мәселелері жөніндегі тұрақты комиссия отырысына 9 депутат қатысты. Облыста абаттандыру жұмыстарына жалпы 1,5 млрд теңге қаржы қарастырылған. Мұның ішінде, Келес ауданындағы абаттандыру жұмыстарына 131 млн теңге, Түркістан қаласындағы Саттарханов көшесін көгалдандыру жұмыстарының екінші кезеңіне 582 млн теңге, республикалық бюджет есебінен қаржыландырылған «Парасат» және «Астана» саябақтарына 10% қаржыландыру жергілікті бюджеттен бөлінген. Отырыста облыстағы маңызды мәселелер қаралып, барлық сала бюджеті сараланды. Айта кетейік, Оңтүстік Кореяның жетекші университетімен Түркістан қаласында IT университетін ашу жоспарланып отыр.
Отырыс барысында міндетті гигиеналық құралдарға бөлінген қаржы мәселесі қаралды. Балаларға арналған жөргектің бағасын сұраған депутат сауалына жауапты басшылар нақты бағасын айта алмай әлекке түсіп, жиын соңына дейін анықтаймыз деді. Одан бөлек «Біргөлік» демалыс аймағындағы су құбырларын жөндеу, Жангелдин көшесінің 4 жылдан бері аяқталмай келе жатқан құрылыс мәселесі де талқыланды.
Жоғарыда айтып өткеніміздей жөргектің бағасын білмей әлек болған басшы уәде еткендей отырыс соңында депутаттар сауалына жауап берді. Дегенмен жауапқа қанағаттанбаған Төрегелді Қалмұратов облыстың бюджетін экономдау керектігін жеткізді.
Түстен кейін жалғасын тапқан отырыста әлеуметтік-мәдени даму, мемлекеттік-құқық, жергілікті өзін-өзі басқару және депутаттық этика мәселелері жөніндегі тұрақты комиссиясы бас қосты. Жиында барлық сала бюджеті сараланып, әлеуметтік сұрақтар талқыланды. Сонымен қатар отырыс барысында облыс әкімдігі жанындағы сыбайлас жемқорлыққа қарсы іс-қимыл жөніндегі ведомствоаралық комиссияның дербес құрамына өзгерістер енгізу жайы талқыланды.
