Елімізде жыл сайын шілденің алғашқы жексенбісінде Ұлттық домбыра күні атап өтіледі.Соның жалғасы ретінде мегаполистің «Shym City» шағынауданындағы жаңа саябақ аумағында “Ұлттың рухы – Домбыра”атты гала-концерт өтті. Салтанатты мерекеде қала тұрғындары мен қонақтарына мәдениет үйінің әртістері мен шығармашылық үйірмелердің жас өнерпаздары бірігіп, берері мол рухани кеш сыйлады.
Қазақтың қара домбырасы – ұлтымыздың бойтұмары. Мерекелік концертке әсем ән мен тәтті күй сыйлаған «Шымкент концерт» ұйымының Қазақ ұлт аспаптар оркестрі, «Қазына» би ансамблі, «Қаған» этно-фольклорлық ансамблі және дәстүрлі әншілер мен күйшілер, шығармашылық үйірмелерінің 400-ге жуық жасөспірім домбырашысы қатысты. Басты мақсат -Ұлттық домбыра күні мерекесін халықтық сипатта насихаттау, қоғамды ұлттық мәдениет пен бірегейлікті сақтау мен қайта жаңғыртуға шақыру.
Домбыра қазақтың киелі мұрасы. Күйшілер ерте заманнан бері қадірін жоғалтқан жоқ. Киелі аспапты елімізде ғана емес, алыс-жақын шет елдерде де танытқан тұлғаларымыз жетерлік.Атап айтсақ Әміре Қашаубаев,Дина Нүрпейісова,Нұрғиса Тілендиев секілді бір туар тұлғаларымыз халқымыздың ажырамас бөлігіне айналған аспапты дәріптеп ұлықтап жүрген.Мерекелік кеште ұмыт болып жатқан күйлерді қайта жаңғыртып қала тұрғындарының жүрегінен орын тапты.Жалпы гала-концертте 500-ден аса өнерпаздар халыққа көтеріңкі көңіл күй сыйлады.Жыл сайын атап өтілетін бұл мерекелік күннің ұлттық руханиятымызға қосар үлесі салмақты болмақ. Айта кетейік Шаһарда 3 шілдеден бүгінгі атаулы күнге дейін халық көп шоғырланатын орындарда домбыра күніне орай бірқатар көпшілік іс-шаралар ұйымдастырылып келді.
