Енді қала аумағында заңсыз орналасқан құрылыс материялдары саудаланатын базарлар қала сыртына көшіріледі. Шаһар басшысының тапсырмасына сәйкес кәсіпкерлерге түсіндіру жұмыстары жүргізіліп келеді. Кезекті кездесу Бадам бағытындағы жаңадан бой көтерген сауда орталығында өтті.
Бұл несие алып несібесін теріп жүрген бір топ кәсіпкерлер. Олар құм, шағал тас, ағаш секілді құрылыс материялдары саудаланатын базарларда табыс тауып келеді. Дегенмен салмағы белгіленген межеден асып, құрылыс материялдары артылған жүк көліктері жолдардың тоз тозын шығарып қана қоймай, сауда орындарында да залал келтіруде. Қаланың көркейтуінде кедергі келтіріп жатқан кәсіп иелері мегаполис мэрінің қабылдаған маңызды шешіміне наразы. Себебі белгіленген нүктеге жеткізу қызметі тапсырыс берушіге де сатушыға да әлде қайда қымбатқа түсетінін айтады.
Кәсіпкерлер қаладан көшу үшін күз мезгіліне дейін уақыт сұрайды. Дегенмен бұл мәселе жақында ғана көтерілген жоқ. Шешім қаңтар айында қабылданып, кәсіпкерлерге 6 ай уақыт берілген. Ал, жиында қала әкімінің кеңесшісі жылы орнынан жылжымай отқан азаматтар қаланы абаттандыру жұмыстарына кедергі келтіріп жатқанын айтып түсіндірді.
Айта кетейік, халыққа қолайлы жағдай жасау мақсатында қаланың 5 нүктесінде құрылыс материялдары сатылатын арнайы орындар ұйымдастырылды. Олар Алтынтөбе, Бозарық, Құрсай, Бадам және Қызылсай шағын аудандарында орналасқан. Бұл шаралар қаланың шырайын бұзған келеңсіздіктерді жойып, қала ішінде көліктер мен жолаушыларға қолайлы жағдай туғызады. Ал кәсіпкерлер бұл тапсырманы жақын арада орындамаса айыппұл арқалайды.
