Шымкенттік оқушы шетелдік 21 университеттен шақырту алды. Оқу жылы тәмамдалмай жатып әлемдік деңгейдегі үздік оқу орындарында грантпен білім алуға қабылданған талантты түлек Италия елін таңдап отыр. Шаһардағы кәсіби бағдар беріп, тіл үйрету арқылы білімге баулитын орталықтың мүмкіндіктерін қолданған биылғы жылдың 30 түлегі толықтай шақырту алыпты.
Білім беру мазмұнын қазіргі заман ағымымен үндестірген Альфа академиясының Шымқаладағы филиалының ашылғанына 3-ші жыл. Талантын талап қоя отырып шыңдаған, үздіксіз оқудың арқасында әлемнің 21 оқу орнынан шақырту алған Нұрай Бейбітбай. Ол Американың, Еуропаның, БАӘ-нің үздік университеттеріне шақырту алыпты.
Жыл сайынғы түлектеріне шет елде оқуға мүмкіндіктер жолын көрсететін білім орталығы 2023-2024 оқу жылының қорытындысы бойынша 30 түлектің барлығы 100% шақырту алып отыр.
Жалпы, АҚШ, Италия, Испания, Венгрия, Германия, Канада, Қытай, Оңтүстік Корея, Латвия, Литва, Сингапур, Малайзия, Англия және тағы да басқа елдерге түлектер 1500-ден астам портал толтырып (құжат тапсырып), 420дан астам шақырту алыпты. Академияның түлектеріне берген қаржылық грант сомасы 12 миллион доллар (5 миллиард 307 миллион 800 мың теңге).
Осы уақытқа дейін білім алған мыңдаған шәкірт бүгінде шет елде жоғары білім алып жатыр. Олармен арадағы байланыстың үзілмегенін айтқан орталық басшысы студенттер мамандықты игеруден, белгілі бір саланың иесі атанғанға дейін жұмыс жалғасады дейді. “Альфа академия” білім беру орталығы оқушыларға тек білім беріп қана қоймай, түрлі ғылыми, қоғамдық жұмыстар арқылы жаңа ортаға, түрлі ситуациялық жағдайларға машықтайды.
