Еліміздің үшінші шаһары тағы бір әсем гүлзармен толықты. Сайрам-Жібек жолы көшелерінің қиылысында орналасқан нысан «Биг тулип» деп аталады. Бүгінде аумағы 1 гектарды құрайтын демалыс аймағы ел игілігіне пайданалуға берілді. Қала әкімі Ғабит Сыздықбеков арнайы келіп, халықты жаңа гүлзардың ашылуымен құттықтады.
5 жыл бұрын мегаполисте филиалы ашылған “BI-Group” компаниясының өкілдері қаламызда бірқатар тұрғын үй ғимараттарын салып, бизнесін өрге домалатты. Енді, қаланың өркендеуіне өз үлестерін қосып, шаһарымызды одан әрі көркейтіп, дамыту мақсатында “Big Tulip” гүлзарын салып, компанияның қолтаңбасын қалдырды. Жұмысшылар құрылысты 1,5 ай ішінде, қала күніне орай аяқтады. Кіреберісте орналасқан 5 қызғалдақ түнде жарқырап, қаланың көркін арттырады.
Нысанның ашылуына қала әкімі Ғабит Сыздықбеков арнайы қатысып, жергілікті тұрғындармен тілдесті.
Халықты жаңа гүлзардың ашылуымен құттықтаған шаһар басшысы, демалыс аймағын күтіп ұстаудың маңыздылығына тоқталып өтті. Себебі, көздің жауын алатын гүлдер мен жасыл өскіндер көпшіліктің көзайымына айналуы тиіс. Аумағы 1,1 гектарды құрайтын демалыс аймағы заман талабына сай жасалған. Аллеяға келген қала тұрғындары шаһарымыздың көркейіп келе жатқанына дән-ризалығын білдіріп, алғыстарын айтты.
Айта кетейік, Шымкент қаласының аумағында қалалық жайлы ортаны дамыту басқармасымен күтіп-ұсталынатын 10 саябақ, 45 гүлзар мен аллея бар.
