Абай ауданында 86 көше жарықтандырылады. Бұл туралы Өңірлік коммуникациялар қызметінде өткен брифингте Абай ауданының әкімі хабарлады. Сондай-ақ Бұхарбай Парманов ауданның әлеуметтік-экономикалық дамуы бойынша 1-тоқсанда атқарылған жұмыстарды баяндады.
Брифинг барысында 27 елді мекеннің бүгінгі таңда 100 пайыз ауыз сумен және электр жарығымен қамтылғанын айтты. Оның ішінде 23 елді мекен газбен қамтылып, бүгінгі таңда 3 елді мекенде құрылыс жұмыстары жүргізіліп жатқанын баяндады. Сондай-ақ, аудан әкімі ауданның инфрақұрылым жүйелерімен қамту көрсеткішіне де тоқталды. Қазіргі таңда 7 елді мекен кәріз жүйесімен қамтылған. 2025 жылы 8 нысанға құрылыс жұмыстарын бастау жоспарланып отқанын айтып, нәтижесінде 2025 жылы Абай ауданында кәріз жүйесімен қамту көрсеткіші 18 пайыздан 55,5 пайызға дейін өсетінін жеткізді. 
Одан бөлек, Абай ауданындағы өзекті мәселелердің бірі ретінде қала әкімінің тапсырмасына сәйкес, 2024 жылы жарықтандырылған көшелердің үлесін арттыру мақсатында 86 көшеге бюджеттік өтінім беріліп, 500 миллион теңге қаржы қаралған.
Айта кетейік, алдағы уақытта аудан аумағына жыл ішінде 20 қоқыс алаңшасын орнату және орталық көшелерге 200 дана қоқыс жәшіктерін қою, 9 нысанға ирригациялық жүйелер орнату жұмыстары атқарылатын болады.
