Шымкентте 2023-2024 оқу жылын 13286 оқушы аяқтайды. Бұл туралы Өңірлік коммуникациялар қызметінде өткен брифингте Шымкент қаласы білім басқармасының басшысы хабарлады. Жиында Нұргүл Шәмшиева “Соңғы қоңырауды тойлау кезінде түлектердің қауіпсіздігін қамтамасыз ету” тақырыбы аясында баяндама жасады. Сондай-ақ, білім басқарма басшысы 25 мамырда өтетін салтанатты іс-шарада мектеп бітірушілерге мерекелік шараларға аниматорларды , мерекелік дастархандарды, жалға берілетін автокөліктерді пайдалана отырып, қала бойына экскурсиялар өткізуге, әкімшілік және педагогикалық ұжымға сыйлыққа қаражат жинауға рұқсат етілмейді, деді. Себебі, жылда өкінішке орай осындай іс-шаралардың нәтижесінде балалардың өміріне, денсаулығына қауіп төнетін жағдайлар да орын алып жатыр.
25 мамыр күні еліміздің барлық мектептерінде яғни, 1-10 сынып аралығында оқушылар үшін “Білімім-Отаныма” тақырыбында бірыңғай сынып сағаты өтеді. Ал 186 мың қазақстандық 11-шы сыныпты бітіруші үшін соңғы қоңырау 25 мамыр күні “Мектебім, саған мың алғыс!” тақырыбында іс-шарасы өткізіледі. Ал, мектеп бітірушілер үшін салтанатты іс-шара міндетті түрде мектеп қабырғасында және алаңында өткізу міндеттеліп отыр.
Биыл 11 сыныпты бітіретін 13 286 оқушының 12066-сы Ұлттық Бірыңғай Тестін тапсырады. Ағымдағы жылы Ұлттық Бірыңғай Тест 16 мамыр мен 5 шілде аралығында өткізіледі. Ал, ҰБТ қатысушыларының деректер базасына тіркелу өз бетінше 2024 жылғы 20 сәуір мен 20 мамыр аралығында жүргізіледі. Осы аралыққа дейін тестілеуге 2 рет өтініш беруге мүмкіндік беріледі.
