Ресейдің Кемерово облысының тізгінінжиырма жылдан астам уақыт бойы ұстаған губернатор, белгілі мемлекет және қоғам қайраткері Амангелді Төлеев 79 жасында көз жұмды. Дегенмен, дара тұлғаның есімін елге таныту мақсатында «Жеке тұлғаның қоғамдық-саяси өмірдегі рөлі” атты 80 жылдығына орай халықаралық ғылыми-теориялық конференция өтті. Айтулы күні белгілі ғалымдар мен елімізге танымал зиялы қауым өкілдері, Амангелді Төлеевтің қызмет еткен Кемерово облысының зиялы азаматтары мен көзін көрген замандастары, туған-туыстары, шәкірттері қатысты.
Ресейдің Кемер облысын соңғы 20 жылдан астам уақыт бойы, 1997-жылдың шілде айынан бері басқарып келген Аман Төлеев 13 мамырда 80 жасқа толар еді. Бірақ қоғам қайраткері бұл жасқа жете алмады. Дегенмен, асыл азаматты ұмытпаған қазақ елі бүгінгі күні ол кісінің есімін өз жұртына, жастарға таныту мақсатында біршама істер атқарып келеді. Соның бірі Түркістан сарайында Қазақстанға еңбегі сіңген қайраткер Бекет Тұрғараевтың бастамасымен “Жеке тұлғаның қоғамдық-саяси өмірдегі рөлі” атты 80 жылдығына орай халықаралық ғылыми-теориялық конференция өтті. Шымкент қаласы әкімінің орынбасары Сәрсен Құранбек конференцияны ашық деп жариялап, қала әкімі Ғабит Сыздықбековтың құттықтау хатын оқыды.
Конференцияға Астана, Алматы, Шымкент қалалары мен Түркістан, Қызылорда облыстары мен өзге де өңірлерден ҚР Парламентінің депутаттары, түрлі сала өкілдері, сондай-ақ Ресей Федерациясы Кемерова облысынан келген арнайы қонақтар қатысты. Жиында белгілі ғалымдар мен елімізге танымал зиялы қауым өкілдері қазақтың қайсар ұлы Амангелді Төлеевтің жасаған еңбегімен, ерлігімен, өмірімен және естеліктерімен бөлісті.
Аман Төлеев 1944 жылы Красноводск қаласында дүниеге келген. Әкесі – қазақ. Молдағазы Ақтөбе облысындағы Ойылда туғанмен, саналы ғұмырының бір кезеңінде Шымкентте қызмет істеген. Төлеевтер отбасының арғы тарихы да біздің өңірмен байланысты. Аманкелді Төлеев 1997 жылдан Кемерово облысының губернаторы болды. 3 рет (1991, 1996, 2000) Ресей Федерациясының Президенттігіне кандидат болып тіркелген. Амангелді Төлеевті біздің бүгінгі және келер ұрпағымызға тану артық етпес. Өйткені ол – атажұртынан қиырда жүрсе де, ақыл-парасатымен, болмыс-бітімімен өз ұлтының мерейін өсіріп, елінің абыройын асқақтатқан қажырлы азамат.
Ұлы тұлғаларымыздың есімін құрметтеп, ұрпақ жадында қалдыру біздің асыл міндеттеріміздің бірі болуға тиіс. Ол біздің ата-баба алдындағы қасиетті парызымыз болмақ. Бұл халық үшін керек, өйткені Амангелді Молдағазыұлы сыртта жүрсе де, жеке үлгісімен ұлтына қызмет етті, халқының адал ұлының қандай болатынын кейінгілердің жүрегіне құйып кетті, деді Қазақстанның еңбек сіңірген қайраткері Бекет Тұрғараев. Айта кетейік, ол орыс жерінде 21 мешіт салғызып, дінімізді құрметтеген кемеңгер тұлға.
