2024-2026 жылдарға арналған Шымкент қаласының бюджетіне өзгерістер енгізілді. Сегізінші шақырылымдағы мегаполис мәслихатының кезектен тыс өткен сессиясының күн тәртібінде 3 мәселе қаралды. Жиында басқарма басшылары тарапынан қандай ұсыныстар айтылды?
2023 жылғы 12 желтоқсандағы мегаполис мәслихатының шешіміне өзгерістер енгізу туралы кезектен тыс сессияға жалпы 26 депутат қатысты. Шаhар басшысы Ғ. Сыздықбековтің қатысуымен өткен жиында Экономика және бюджеттік жоспарлау басқармасының басшысы алдағы атқарылатын жұмыстар нәтижесінде қала бюджеті артатынын айтты.
Ерлан Бастарұлының баяндамасында айтылған ұсыныстарды депутаттар бір ауыздан мақұлдады. Ал, Шымкент қаласы Жайлы ортаны дамыту басқармасына қарасты 34 өзен-каналдар бар. Басқарма басшысы Әбілқайыр Бақытқалиұлының айтуынша санитарлық және механикалық тазалау жұмыстарына арнайы құрылған жоба екі жақты келісіммен жұмысы тоқтатылды.
Дегенмен, жұмысты жандандырып, сапасын жақсарту үшін арнайы комиссия құрылған болатын. Комиссияның жүргізген жұмыстары нәтижесінде 5 кемшілік анықталған.
Сонымен қатар, Шымкент қаласында әлеуметтік көмек көрсетудің оның мөлшерлерін белгілеудің және мұқтаж азаматтарға көрсетілетін жекелеген санаттар тізбесін айқындау мәселесінде шешім бекітілген. Шешімге өзгерістер мен толықтырулар енгізілді.
Жиын соңында қала әкімі Ғ. Сыздықбеков аталған ұсыныстар халықтың өзекті мәселелерін шешуге, әл ауқатын арттыруға бағытталғанын айтты.
