Рухани өлке — Түркістан облысының бюджеті биыл едәуір өсіп, 1 трлн 408 млрд теңгені құрап отыр. Облыстық мәслихаттың кезекті 9-шы сессиясында өңір басшысы бастаған әкімдік қызметкерлері, бұқарының сенімі мен үмітін арқалаған депутаттар ағымдағы жылдың бюджетін бекітті. Яғни, аймақтың әлеуетінің артуына үлес қосып жатқан салалардың дамуына қажетті қаржы бөлініп, жұмыс жанданбақ. Сессия басталмас бұрын бюджет, экономика және ауыл шруашылығ мәселелері жөніндегі тұрақты комиссияның мүшелері екінші отырысын өткізді.
Күн тәртібінде 1 ғана мәселе. Облыстың 2024-2026 жылдарға арналған бюджетін нақтылау. Тақырып аясында тиісті басқарманың басшысы Қанат Қайыпбек баяндама жасап, қазынаның қомақты қаржысы қай салаға бөлінетіндігін атады.
Депутаттар осыған дейінгі комиссия отырысында қаралып, сын-ескертпе, ұсыныс айтылған бұл мәселені ыждағатпен тыңдап, қолдады. Осымен, сессияның қарауына ұсынды.
8-ші шақырылым депутаттарының 2024 жылғы алғашқы жиыны. Кезекті 9-шы сессияның ауқымы кең, қаралатын мәселе көп болды. Мәслихат төрағасы Нұралы Әлмаханұлы жиынды жүргізіп, облыс әкіміне 18 мәселені таныстырды.
Салалар бойынша басқарма басшылары баяндама жасап, өткен жылдың қорытынды мәліметін таразылай келе, ағымдағы жылдың жоспарымен бөлісті.
Бұзылған мемлекеттік сатып алулардың негізгі себебі — қате түзілген құжаттар, қаржының қысқаруы және біліксіздіктен деген мемлекеттік сатып алу басқармасының басшысы Нұрлан Әмірбекұлы мамандарды түрлі оқыту курстарына қатыстырып жатқанын айтады.
3 тұрақты комиссияның отырысында қаралған стратегия және экономикалық даму басқармасының баяндамасы сайлаушыларының сенім үдесінен шыққысы келетін депутаттар үшін де, әкімдік үшін де маңызды. Өйткені, даму жоспарына, облыстың бюджетіне сай жүргізілетін жұмыстардың жүйелі, әрі тез орындалуы қаржыға келіп тіреледі. Қанат Әбдіразақұлы миллиардтаған теңгеден тұрмысын тіктейтін қай салалар екенін айтты.
Сессияда сондай-ақ, дін істері, спорт, білім, денсаулық басқармасы басшыларының, облыстық мәслихат төрағасы мен тұрақты комиссия төрағаларының есептері қаралды.
Сонымен қатар, облыстық мәслихат құрамы өзгеріп, 2 депутат мандатын тапсырса, босаған орынды Ержан Үсентаев пен Жамшидбек Жұмабеков толтырды. Кеудесіне төсбелгі тағып, халықпен бірге тығыз жұмыс істеуге кіріскен су жаңа депутаттарға әріптестері сәттілік тіледі.
Сессия соңында облыстың дамуына сеп болып, ірілі жұмыстардың жүруіне атсалысып келе жатқан мандат иелеріне Дархан Амангелдіұлы алғыс айтты. Сондай-ақ, Ораза айтымен құттықтап, елдегі болып жатқан төтенше жағдайды да тасада қалдырмады. Бір жағадан бас, бір жеңнен қол шығарып, қиын күндерден аман шығуға атсалысуға шақырды.
2024-ші жылды бастаған 9-шы сессия отырысы 18 мәселені қарап, тиісті шешімдер қабылданып, ақ жағалылар мен халық қалаулылары бірлесіп ел үшін қызмет етуге кірісті.
