Туған елге, жерге деген сүйіспеншілік адамды алға жетелеп отырады. Түркістан облысы мәслихатының депутаты, Қазақстан Журналистика академиясының академигі Дулат Әбіш кіндік қаны тамған жерінде ауылдастарымен кездесті.
Қызылкөпір — төл перзентінің тұлға болып қалыптасуында орны ерекше тарихи жер. Бүгінгі Дулат Әбішті ел таныса, кешегі бала Дулаттың болмыс-бітімін Қызылкөпір ғана біледі. Екеуі — егіз жаратылыстай.
Мұхамеджан Тынышбаев атындағы №3 мектептің ұжымы мәслихат депутаты, облыстың «Құрметті азаматы», ұстаз Дулат Әбішпен кездесу ұйымдастырып, 3 буынның арасын жалғаған тағылымды шара өткізді.
Келелі кездесуге мектеп ұжымы, балалармен қатар оқушы Дулатқа білім берген ұстазы Сейдахмет Қожамжаров, 
үзеңгілес достары, ақпарат саласындағы әріптестері, сондай-ақ, Ордабасы ауданы әкімінің орынбасары Мейрамбек Ақмұратов, Ордабасы аудандық мәслихатының төрағасы Бақдәулет Құрманбекұлы,
Бәйдібек аудандық мәслихатының төрағасы Асқар Кенехан,
Арыс қаласы әкімдігінің аппарат басшысы Талғат Анашбеков, Арыс қалалық кәсіподақ ұйымының төрағасы Жұматай Мұхаев қатысты.
Білім бірген ұстазы, қатарластары, журналистикадағы әріптестері мен жас толқынның басын бір арнаға тоғыстырған кездесу – уақытты артқа қарай жылжытқандай болды. Ел үшін жасап жүрген игілікті істері мен депутат ретінде орындап жатқан жұмысын қоғам біледі. Осы тұста мектеп оқушыларының бәрін білгісі келіп қойған сұрақтары белгілі саланың маманы, халық қалаулысының емес, тұлға болып қалыптасқан Дулат Әбіштің әлемін ашты. «Жүрегім өте нәзік» деген ол шәкірт тәрбиесі, достық туралы сыр шертті.
Кездесуде орамды ойын айтып, пікір білдірген азаматтар да: -Дулат Әбіштің өмір жолы «Батыс Қытай – Батыс Еуропа» жолындай бір тегіс емес, бұралаңға толы,-деп, әр кезеңнен әңгімеледі.
Кездесудің ерекшелігі – ашықтықта. Еркін форматтағы жүздесу емен-жарқын әңгімелесуге мүмкіндік берді. Екі сағатқа жалғасқан пікірлесуде – субъективті ой, шынайылыққа негізделген әзіл-қалжың да болды.
Бастысы, кездесуде — мақсатқа, жетістікке жету үшін былай жасаңыздар дейтін ақыл сағаты емес, үш буын да өнеге аларлық өмірлік сабақтар айтылды.
