Қала әкімі кезекті жеке қабылдауын өткізді. Бұл қыркүйек айында келген Ғабит Сыздықбековтің тұрғындарды 3-ші рет бірыңғай қабылдауы.
Мегаполис мэрімен тікелей кездесуге алдын ала 50 азамат жазылған. Қабылдау барысында әр тұрғынның мәселесі тыңдалып, әкім тиісті басшыларға нақты тапсырмалар берді. Оған қоса, қала басшысы бұқараның өтініш-тілектерінің ешбірі ескерусіз қалмайтынын айтып, бәрі заң аясында шешілетінін жеткізді.
Сонымен қатар, әкім орынбасарлары, аудан әкімдері, департамент пен басқарма басшылары тұрғындардың арыз-шағымына назар аударып, тиімді шешу жолдарын айтты. Ал күрделі әрі шешімін табу үшін ұзақ мерзімді қажет ететін мәселелер әкім орынбасарларының бақылауында болатынын түсіндірді.
Кезекті бірыңғай қабылдау күнінде баспанамен қамту, жер телімін бөлу және әлеуметтік мәселелер көп көтерілді. Жалпы, 300-ге жуық азаматтың өтініш-тілегі тыңдалды. Ғабит Сыздықбековтың жеке қабылдауына жазылуды Шымкент қаласы әкімі аппаратының өтініштерді қарауды бақылау бөлімі жүргізеді.
