Таза қала акциясы аясындағы сенбілік мектептерде жалғасын тапты. Әкімдік бастаған шараны экология, өлкетану және туризм орталығы жалғастырып, оқушылардың қоршаған ортаға оң көзқарас қалыптастыруына үлес қосты. Тал егу – табиғатты аялау. Осылайша тәрбиенің баспалдағы басталатын орыннан ертеден келе жатқан өнегелі дәстүр дәріптелді.
Мегаполистегі 4 білім ұясында «Менің атаулы ағашым» табиғатты қорғау акциясы аясында сенбілік акциясы өтті. Аталған шара 25 қазан Ресаублика күні мерекесі мен қала әкімдігінің «Таза қала – өзіңнен басталады» акциясы аясында өтіп отыр. Мақсат – оқушылардың қоршаған ортаға, табиғатқа деген танымдық көзқарасын дамыту, сабақтан тыс демалыс уақытын тиімді ұйымдастыру. Экология, өлкетану және туризм орталығы ұйымдастырған сенбілік №49, 79, 132, 135 мектепте өтті.
Сенбілік басталмас бұрын мерекелік шара өтті. Жиынға білім басқармасы, Сайрам-Өгем мемлекеттік ұлттық табиғи паркі, «Мұрагер» республикалық қоғамдық бірлестігінің ардагерлері қатысып, табиғат үшін маңызды сенбілікке баршаны бірлесе атсалысуға шақырды.
Белгіленген орында 7 түрлі тал көшеті отырғызылды. Акция аясында 4 мектепке 105 данадан, жалпы саны 420 түп көшет үлестірілген. Арша, бозарша, қарағай, шынар ағаштарын оқушылар мен еңбек ардагерлері бірлесе отырғызып, атадан мал қалғанша, тал қалсын деген ұлағатты сөзді ұлықтады.
«Бір тал кессең, он тал ек» деген қағиданы қаперінен шығармаған қаланың жанашырлары тал егіп, қоршаған орта үшін қайырымды іс істеді. Тал – бейбітшілік нышаны, нәзік табиғатты қорғаудың жарқын үлгісі.
