Шымкентте алғаш рет қуыршақ театрларының халықаралық фестивалі өтуде. Шараға келген 13 елдің өнер ұжымдары 5 күн сахналық қойылым қойып, қала тұрғындарына өнерлерін паш етпек. Айтулы жиын мегаполистің қуыршақ және жасөспірімдер театрының 40 жылдық мерейтойына орай ұйымдастырылды.
Шымкентте өтіп жатқан қуыршақ театрларының І халықаралық «Puppetland» фестивалі 13 қазаннан бастау алды. Жиынға Армения, Польша, Гонконг, Израиль, Иран, Қырғызстан, Өзбекстан, Перу, Түркия, Ресей, Чехия, Эстония, Тәжікстан мен еліміздің бірқатар өңірлерінен өнер ұжымдары қатысуда. Айтулы фестивальдің шымылдығы Арбат алаңынан басталды. Шараның ашылуын қала әкімінің бірінші орынбасары Қуаныш Асылов бастап, ұжымды, өнер иелерін құттықтады.
Фестивальді өткізудегі негізгі мақсат – отандық қуыршақ театры өнерінің дамуына үлес қосу, әртістердің кәсіби деңгейін арттыруға мүмкіндік жасау. Сонымен қатар, мұндай шаралар мәдениет саласын дамыту бойынша халықаралық байланыстарға жол ашады.
Арбат алаңына жиналған әр елдің өнерпаздары өзіндік сахналық киімімен дараланып, қала тұрғындарын қызықтырды. Түрлі тақырыпқа құрылған спектакльдер 13 қазаннан бастау алып, 5 күн бойы, яғни 18-не дейін жалғасын табады.
Шараның ашылу салтанатынан соң қалалық орыс драма театрында баспасөз конференциясы мен театрлар арасында ынтымақтастық орнату жөніндегі меморандумға қол қою рәсімі өтті.
Айта кетейік, фестивальге шет елдерден келген 13 өнер ұжымы мен еліміздің 7 қуыршақ театры қатысып жатыр.
