«Архив және болашақ ұрпақ» жобасы. 21 қыркүйекте еліміздің барлық мемлекеттік архивтерінде Ашық есік күні өтті. Мақсат — өскелең ұрпақты тарихты зерделеуге баулу. Жоспарға сәйкес Ресей мемлекетінің архивтерінен әкелінген құжаттар негізінде ХІХ ғасырдың 2-ші жартысындағы «Шымкент өңіріне тарихи саяхат» тақырыбымен жас тарихшылар пікірталас алаңына топтасты.
Қазақстан Республикасының Мәдениет және ақпарат министрлігі Архив, құжаттама және кітап ісі комитетінің бастамасымен «Архив және болашақ ұрпақ» жоба аясында мегаполистің мұрағатында ашық есік күні өтті. Арнайы шара жастарды Отансүйгіштік пен патриоттық сезімге тәрбиелеу, аға буынның еңбек жолдарын үлгі ету, ұрпақтар сабақтастығын сақтау, сондай-ақ архив құжаттарын насихаттау және архив саласының имиджін арттыруға баулиды дейді ұйымдастырушылар.
Ауқымды іс-шараға жоғары және орта арнаулы оқу орындарының білім алушылары мен жалпы орта мектеп оқушылары қатысты. «Оқушылар сарайының» көркемөнерпаздары күй мен әннен шашу шашып, көрермендерді сүйсінтті. № 80 ІТ лицей-мектебі мен №62-ші Н. Төреқұлов атындағы жалпы орта білім беретін мектебінің оқушылары архивтік құнды құжаттар негізінде жасалған «Тарихыңды тани біл» атты көрменің таныстырылымы және архивке экскурсия жасады. «Архив-2025» кешенді жоспарына сәйкес Ресей мемлекетінің архивтерінен әкелінген құжаттар негізінде ХІХ ғасырдың 2-ші жартысындағы «Шымкент өңіріне тарихи саяхат» тарихи-сабақ, оқушылар арасында тарихи оқиғаларға қызу пікірталас жүрді.
Шымкент қалалық мемлекеттік архивінің жеке тектік қор құрушылары, Қазақстан Республикасының Мәдениет қайраткері «Құрмет» орденінің иегері, «Шымкент қаласының Құрметті азаматы», белгілі актер — Мұхан Шакировпен, Қазақстан Журналистер Одағының мүшесі, Әлем Халықтары Жазушылар Одағының мүшесі, қаламгер Жүнісова Фатима Забурақызы мен «Мұрағат ісі» факультетінің студенттерінің қатысуымен дөңгелек үстел өтті.
Шымкент қаласының ежелгі тарихынан бастап бүгінге дейінгі құнды құжаттарды, күнделікті болып жатқан елеулі оқиғаларды архивке жинап, ертеңгі ұрпаққа қалдыруда аянбай еңбек етіп жатқан мұрағатшылардың еңбегі ерен.
